მიხეილ სააკაშვილი აღფრთოვანებული დარჩა შედეგებით, განსაკუთრებით, თბილისის მონაცემი იყო მისთვის შთამბეჭდავი - ეკა ხერხეულიძე

სრულიად აღფრთოვანებული დარჩა იმ შედეგებით, რაც ვუთხარი, განსაკუთრებით თბილისის მონაცემი იყო მისთვის შთამბეჭდავი - თქვა "ნაციონალური მოძრაობის" წევრმა, ეკა ხერხეულიძემ რუსთავის ციხეში საქართველოს მესამე პრეზიდენტის, მიხეილ სააკაშვილის მონახულების შემდეგ.

როგორც ხერხეულიძემ აღნიშნა, მიხეილ სააკაშვილი ფიქრობს, რომ გაყალბებისა და შანტაჟის მიუხედავად, არჩევნებში მიღწეული მონაპოვარი, ოპოზიციამ მეორე ტურში ბოლომდე უნდა მიიყვანოს.

"ჩვენი სასაუბრო თემა იყო გუშინდელი დღე, მე ვიყავი პირველი ადამიანი, ვისგანაც შეიტყო რა მოხდა გუშინ ქვეყანაში, რა შედეგები დადგა. სრულიად აღფრთოვანებული დარჩა იმ შედეგებით, რაც მას ვუთხარი, განსაკუთრებით თბილისის მონაცემი იყო მისთვის შთამბეჭდავი. ესმის რა ბრძოლა გაიარა ქართველმა ხალხმა, რა წნეხის ქვეშ მიიღო ის გადაწყვეტილება, რაც მიიღო და არაჩვეულებრივად იცის, გაყალბების, მოსყიდვის, შანტაჟის ფონზე, როგორი მისაღწევია ასეთი შედეგის გაფორმება. თორემ იცის, რომ გაცილებით დიდი და მაღალი პროცენტია ოპოზიციის მაჩვენებელი. მეორე ტურში მონაწილეობაზე ცალსახად თქვა, რომ გამარჯვების ხელიდან გაგდება გაუმართლებელია. ბოლომდე უნდა იბრძოლოს ქართველმა ხალხმა და განსაკუთრებული სიმტკიცე, ძალისხმევა სთხოვა ნიკა მელიას, რომ მან თავისი დიდი მონაპოვარი ბოლომდე მიიყვანოს", - ამბობს ეკა ხერხეულიძე. 

მრავალწლიანი პოლიტიკური დევნილობის შემდეგ, მიხეილ სააკაშვილი რამდენიმე დღის წინ სამშობლოში დაბრუნდა, მიუხედავად მისი დაპატიმრების მუქარისა.

მის დაკავებასთან დაკავშირებით დღეს უკრაინის პრეზიდენტმა გააკეთა განცხადება და აღნიშნა, რომ ის, როგორც პრეზიდენტი, მუდმივად ცდილობს საკუთარი ქვეყნის მოქალაქეების ქვეყანაში დაბრუნებას და ამ კუთხით, არც მიხეილ სააკაშვილი იქნება გამონაკლისი. 

ზელენსკის განცხადებას ეკა ხერხეულიძემ ასე შეაფასა: "ადამიანურად მისასალმებელია, მაგრამ ის, რომ მიხეილ სააკაშვილი, შემოსული რისკის ფასად, გავატანოთ ისევ სხვა ქვეყანას, ჩემთვის არ იქნება მარტივი გადასაწყვეტი", - თქვა ხერხეულიძემ.

იხილეთ ასევე:

20 ქალაქი, სადაც მერს მეორე ტურში აირჩევენ - ნახეთ სია