მიხეილ სააკაშვილის სამოქალაქო კლინიკაში გადაყვანის მოთხოვნით, ვილი პაჭკორია შიმშილობას იწყებს
გამოქვეყნდა:
საქართველოს კლინიკების ასოციაციის ხელმძღვანელი, ვილი პაჭკორია მესამე პრეზიდენტის შესაბამის სამედიცინო დაწესებულებაში გადაყვანის მოთხოვნით შიმშილობას იწყებს. ამის შესახებ მან ჯანდაცვის სამინისტროსთან ოპოზიციის აქციაზე განაცხადა.
"საქართველოს კლინიკების ასოციაციამ რამდენჯერმე გააკეთა განაცხადი იმასთან დაკავშირებით, რომ ციხის ე.წ ამბულატორია არ წარმოადგენს სტაციონარს და ტყუილად ნუ გვატყუებს ჯანდაცვის სამინისტრო და ნუ წარმოგვიდგენენ მას როგორც მაღალი დონის სტაციონარს, ეს არის გამორიცხული, ის არ აკმაყოფილებს არანაირ კრიტერიუმებს და იქ ყოფნა მესამე პრეზიდენტისა ფაქტიურად არის სასიკვდილო განაჩენი.
აქედან გამომდინარე, სასწრაფოდ, დაუყოვნებლივ ჯანდაცვის მინისტრმა უნდა უზრუნველყოს მისთვის შესაბამისი მრავალპროფილური სტაციონარი, ქალაქის ტიპის და გადაიყვანოს მესამე პრეზიდენტი საქალაქო ტიპის სტაციონარში, წინააღმდეგ შემთხვევაში, თუკი რამდენიმე წუთში ამ საკითხზე არ შეგვხვდება, გაგვესაუბრება და მოგვცემს პირობას, მე ვიწყებ შიმშილობას ჯანდაცვის სამინისტროს წინ", - თქვა ვილი პაჭკორიამ.
ცნობისთვის, საქართველოს მესამე პრეზიდენტი 43 დღეა შიმშილობს. 11 ნოემბერს, სტრასბურგის სასამართლოს მოწოდების შემდეგ, მან მზაობა გამოთქვა პროტესტის ეს უკიდურესი ფორმა შეწყვიტოს, გარკვეული დათქმებით.
