"გახდება თუ არა მისი გადაყვანა საჭირო, ეს გადაწყდება ამ საათების განმავლობაში" | დავით სერგეენკოს საგანგებო განცხადება
გამოქვეყნდა:
"ადგილზე განხორციელდება თუ გახდება მისი გადაყვანა საჭირო, ეს გადაწყდება ამ საათების განმავლობაში ჩატარებული კონსულტაციების შემდეგ", - ამის შესახებ "ქართული ოცნების" წევრმა დავით სერგეენკომ გლდანის ციხის დატოვების შემდეგ ისაუბრა, სადაც ის კოლეგებთან ერთად,.რამდენიმე საათის განმავლობაში იმყოფებოდა.
მინდა თავიდანვე ვთქვა, რომ ახლა მისი მდგომარეობა სტაბილურია. იყო გარკვეული პრობლემები რომლის სტაბილიზაციაც მალევე მოხდება, რაც შეეხება გეგმებს, რაც ალბათ ყველაზე უფრო საყურადღებოა, დღესვე დაიგეგმა და უკვე სრულდება რამდენიმე აუცილებელი კონსულტაცია, როცა ექიმი სპეციალისტები ჩამოწერენ უახლოესი საათების, ხვალის სამოქმედო გეგმას, რა კვლევები და ზოგადად რა სერვისებია საჭირო ამ ახალი გამოვლენილი პრობლემის ზუსტი დიაგნოსტიკისთვის, და მინდა დაგარწმუნოთ, რომ პაციენტი მიიღებს ყველა იმ სერვისს, რაც იქნება აუცილებელი მისთვის. კონკრეტულად რა იქნება ეს სერვისები, ადგილზე განხორციელდება თუ გახდება მისი გადაყვანა საჭირო, ეს გადაწყდება ამ საათების განმავლობაში ჩატარებული კონსულტაციების შემდეგ...
აქამდე ჩატარებული კონსილიუმები ძირითადად მიძღვნილი იყო სამედიცინო დაწესებულებების ერთგვარი აუდიტისადმი. რამდენად შეეძლო ამ სამედიცინო დაწესებულებას პოტენციურად ასეთი პაციენტის მართვა. დღევანდელი კონსულტაციები, რომელთაგან ერთ-ერთი ნევროლოგიური უკვე დასრულდა, მიძღვნილია კონკრეტულად იმ მდგომარეობაზე, რაც განვითარდა ამ საღამოს განმავლობაში. ეს არის კონკრეტული სამოქმედო გეგმა უახლოესი საათების განმავლობაში, - ამბობს სერგეენკო.
მიხეილ სააკაშვილის ჯანმრთელობის მდგომარეობის დამძიმებაზე მისმა ადვოკატმა ბექა ბასილაიამ ისაუბრა. თქვა, რომ მიხეილ სააკაშვილი ადვოკატების ოთახის დატოვების შემდეგ, „მოწყვეტით დაეცა“ და გონება დაკარგა.
მოგვიანებით, გლდანის ციხის დატოვების შემდეგ მიხეილ სააკაშვილის ადვოკატმა ნიკა გვარამიამ თქვა, რომ ამჟამად მესამე პრეზიდენტი კონტაქტურია და რეანიმაციულ განყოფილებაში იმყოფება.
