თუ დაიწყებს შიმშილობას, არა უშავს, ექიმები მიხედავენ - ზარქუა მიხეილ სააკაშვილზე

"ქართული ოცნების" დეპუტატის, ირაკლი ზარქუას აზრით, მიხეილ სააკაშვილის გორის ჰოსპიტლიდან ციხეში დაბრუნებით "არაფერი განსაკუთრებული არ მომხდარა".

როგორც ზარქუამ აღნიშნა, "მესამე პრეზიდენტი ჯანმრთელია და ექვემდებარება რუსთავის ციხეში დაბრუნებას".

"სახალხო დამცველის მიერ შექმნილმა კონსილიუმმა დაადგინა, რომ პატიმარი სააკაშვილია არის ჯანმრთელი, შესაბამისად ის ექვემდებარებოდა უკან რუსთავის მეთორმეტე პენიტენციურ დაწესებულებაში დაბრუნებას.

აქ არ მომხდარა რამე განსაკუთრებული და ასე რომ ის, ვისაც დრამატიზირება შემოაქვს და უტრირებს, მათ სინდისზე იყოს. ამით ცდილობენ, რომ ეს ადამიანი კიდევ უფრო რაღაც თავიანთ პოლიტიკურ ბატალიებში ჩაითრიონ. ჩვეულებრივად უნდა უთხრან, აუხსნან, რომ ის არის პატიმარი, მას მისჯილი აქვს კონკრეტულ თემებზე მსჯავრი და შესაბამისად, უნდა იყოს ჩასახლებული თუ ასე ვთქვათ გადაყვანილი შესაბამის უწყებაში.

სააკაშვილი დაიწყებს თუ არა შიმშილობას, დიწყებს, არა უშავს, ექიმები არიან, მიხედავენ, როგორც წინა შემთხვევაში და რა ვიცი, მე მგონი, გამოაჯანმრთელებენ", - თქვა ირაკლი ზარქუამ.

ცნობისთვის, საქართველოს მესამე პრეზიდენტი გვიან ღამით გორის სამხედრო ჰოსპიტალიდან რუსთავის ციხეში გადაიყვანეს. ეტაპირებაზე ინფორმაცია არც ამჯერად ჰქონიათ მის უფლებადამცველებს. მათ მიხეილ მონახულების საშუალება გუშინ არ მიეცათ.

უფლებადამცველები რუსთავის ციხეში ცოტა ხნის წინ შევიდნენ. შეხვედრის შემდეგ გახდება ცნობილი, რა ვითარებაში მოხდა მესამე პრეზიდენტის გორის ჰოსპიტლიდან ციხეში გადაყვანა და ასევე, როგორია ამ დროისთვის მისი ჯანმრთელობის მდგომარეობა.