ყოველდღიურად დავაკვირდებით მოვლენებს - კობახიძე უკრაინიდან საქართველოს მოქალაქეების ევაკუაციაზე
გამოქვეყნდა:
"ოცნების" თავმჯდომარე კობახიძე ამბობს, რომ ხელისუფლება მოვლენებს დააკვირდება და დამატებით ზომებს ამის მიხედვით მიიღებს უკრაინიდან საქართველოს მოქალაქეების ევაკუაციასთან დაკავშირებით.
"ჩვენი და მთლიანად საერთაშორისო საზოგადოების მთავარი ამოცანა უნდა ყოფილიყო უკრაინაში ომის არდაშვება. სამწუხაროდ, ტენდენციები მაინცდამაინც კარგი არ არის. მაინც ვიტოვებთ იმედს, რომ ომი არ დაიწყება, თუმცა რისკები საკმაოდ მაღალია. რაც შეეხება ჩვენს პოზიციას მოქალაქეებთან დაკავშირებით, ყველაფერი გაკეთდება იმისთვის, რომ თითოეული მოქალაქის უსაფრთხოება იყოს დაცული. რა ზომების მიღებაც საჭირო იქნება, ხელისუფლება ყველა ზომას მიიღებს. ამ ეტაპზე საგარეო საქმეთა სამინისტრომ გაავრცელა განცხადება მოსალოდნელ საფრთხეებთან დაკავშირებით. ყოველდღიურად დავაკვირდებით მოვლენებს და ამ დაკვირვების საფუძველზე დამატებით ზომებს მივიღებთ ჩვენი მოქალაქეების უსაფრთხოების დასაცავად“- განაცხადა კობახიძემ.
უკრაინაში შექმნილ ვითარებასთან დაკავშირებით საქართველოს საგარეო საქმეთა სამინისტრომ განცხადება გაავრცელა და იქ მცხოვრები მოქალაქეებისთვის ცხელი ხაზი აამოქმედა.
