მშვიდობიანი მოქალაქეები იღუპებიან, პუტინი ავადმყოფი, ბოროტი ადამიანია - ვიაჩესლავ ჩაუსი
გამოქვეყნდა:
ჩერნიგოვის რეგიონული სამხედრო-სამოქალაქო ადმინისტრაციის თავმჯდომარე, ვიაჩესლავ ჩაუსმა მთელი ღამის განმავლობაში დაბომბილი ქალაქის ცენტრიდან ვიდეომიმართვა გაავრცელა.
დანგრეულ და მიწასთან გასწორებულ ქალაქში მყოფმა ჩაუსმა ცრემლი ვერ შეიკავა, მაგრამ ხაზგასმით თქვა, რომ მტერი მათი ქალაქებიდან აუცილებლად წავა.
"მტერი ჩერნიგოვში ავიაიერიშების მიტანას აგრძელებს. მშვიდობიანი ადამიანები იღუპებიან, ძალიან ბევრი დაშავდა. მტერმა იერიშები სამოქალაქო დაწესებულებებსა და დასახლებულ პუნქტებზე მიიტანა. დღეს სასტუმრო "უკრაინა" დაბომბეს, სასტუმრო აღარ არის, თუმცა არის უკრაინა და ეს უცვლელია. პუტინი ავადმყოფი, ბოროტი ადამიანია, რომელიც სადღაც ურალში, ბუნკერში ზის. ჩერნიგოვი გაზის, გათბობის, ელექტროენერგიისა და სასმელი წყლის გარეშეა დარჩენილი. ცუდად მუშაობს ინტერნეტი და მობილური კავშირები. ჩერნიგოველები მოვითმენთ და მაქსიმალურად გავაკეთებთ ყველაფერს, რომ მტერი ჩვენი ქალაქიდან მალე გავაძევოთ", - თქვა ვიაჩესლავ ჩაუსმა.
