"ვიღაცამ გასცა ნებართვა და ეს ყველაფერი ახლა შესწავლის საგანია" - არახამია ბათუმში შესულ სანქცირებულ ნავთობზე

გამოქვეყნდა:

ფრაქცია "ხალხის მსახურის" ლიდერი დავით არახამია საქართველოში, ბათუმის პორტში შესულ ტანკერთან დაკავშირებით მორიგ განცხადებას აკეთებს. უკრაინის ხელისუფლების წარმომადგენელი ამბობს, რომ საქართველოს ხელისუფლების წარმომადგენლების განცხადებები არადამაჯერებელია:

"მე მოვისმინე ოფიციალური თბილისის განმარტება, რომელიც არც თუ ისე დამაჯერებელია. უპირველეს ყოვლისა იმიტომ, რომ რუსეთს აქვს თავისი წვდომა პორტებთან და მაგალითად ამ ნავთობის გადატვირთვა მათ შეეძლოთ ნოვოსიბირსკის პორტიდან.  ასე მაგალითად, მე ვიცი, რომ მოპარული მარცვლეულის ნაწილი ოკუპირებული მარიუპოლიდან უკვე მიემართება სხვადასხვა პორტებისკენ.  

ჩვენ ხომ ყველამ ერთად მოვისმინეთ ივანიშვილის და ევტუშენკოვის - უკვე სანქცირებული პირის სატელეფონო საუბარი, სადაც ისინი განიხილავენ ამ მარცვლეულის სხვადასხვა გზებით გადატანის საკითხს.  რა თქმა უნდა ამ შემთხვევაში საუბარი არის იმ მარცვლეულზე, რომელსაც უკრაინიდან იპარავენ და იგივე ხდება ნავთობზეც." ამბობს არახამია.   

მისი თქმით, შესწავლის საგანია და აუცილებლად გამოიკვლევენ სპეციალური სამსახურები ევროკავშირსა და აშშ-ში, ყველა გადარიცხვას, ასევე საქართველოს ხელისუფლების შესაძლო მონაწილეობას სანქცირებული ნავთობის გადატანაში.

არახამია კიდევ ერთხელ ხაზგასმით ამბობს, რომ ეს ყველაფერი არ ეხება ქართველ ხალხს:

"ჩვენ ხომ ვიცით რომ ამხელა მოცულობის სანქცირებული ნავთობის გადატანა შეუძლებელი იქნებოდა საქართველოს ხელისუფლების ჩართულობის გარეშე.  ვიღაცამ ამის ნებართვა გასცა და ამ ნავთობის დატვირთვა, დაყოვნება, პორტში შესვლა  - ყველაფერი ეს ახლა შესწავლის საგანია.  ვინ დგას ამ ყველაფრის უკან და რა ბიზნეს ინტერესები იკვეთება მათ შორის ხელისუფლების მხრიდან.  ყველა გადარიცხვა და ფულის მოძრაობა შეისწავლება სპეციალური ჯგუფის მიერ, რომლის შემადგენლობაშიც არიან როგორც შეერთებული შტატების ასევე ევროკავშირის სპეცსამსახურები. დარწმუნებული ვარ სიმართლე მალე დადგინდება და  და ჩვენ ყველანი ვნახავთ რა ხდება რეალურად. 

მე არაერთხელ  ვთქვი მანამდეც, რომ საქართველოს ხელისუფლება  შემჩნეულია რუსეთთან თანამშრომლობაში. აქვე უნდა აღვნიშნო რომ ყოველივე ეს არ ეხება ქართველ ხალხს. ვიცი რომ ბიზნესებიც კი უარს აცხადებენ რუსულ კომპანიებთან თანამშრომლობაზე, რადგან ხვდებიან რომ ამით აგრესორ ქვეყანას ეხმარებიან. იმავეს თქმა არ შემიძლია საქართველოს ხელისუფლებაზე.  ამიტომ ყველა ამ პროცესს ფარდას ავხდით იმისთვის რომ ქართველმა ხალხმა იცოდეს ვისთან და რასთან აქვთ საქმე" ამბობს თავით არახამია

 შეგახსენებთ, "მთავარი არხის" წყაროს ინფორმაციით, სანქცირებული რუსული ტვირთი ბათუმის პორტში თურქეთის დროშის ქვეშ მცურავმა ტანკერმა, "ესენკამ" შემოიტანა. 

სანქცირებული ტვირთის შემოსვლა დღეს დაადასტურა ეკონომიკის მინისტრმაც და შემოსავლების სამსახურმაც. უწყების ცნობით, შემოწმების შედეგად დადგნდა, რომ გემზე განთავსებული საქონელი იყო სანქცირებული კომპანიის ნავთობპროდუქტი, რომელიც თურქეთში უნდა გაგზავნილიყო.

ბოლო ინფორმაციით, ტანკერმა ბათუმის პორტი უკვე დატოვა.

მთავარი 21:00
უყურეთ ბოლო გამოშვებას

იხილეთ ჩვენს ეთერში

დღის მთავარი