ორგანიზაციის უფლების შეზღუდვა და დევნაა - დოლიძე "ოცნების" მიერ ISFED-ის არ მიწვევაზე
გამოქვეყნდა:
"სამართლიანი არჩევნების" დირექტორი, ნინო დოლიძე ამბობს, რომ "ქართული ოცნების" მხირდან საარჩევნო კოდექსის გადასინჯვის თაობაზე შექმნილ სამუშაო ჯგუფში მათი არ მიწვევა ორგანიზაციის დევნა და უფლებების შეზღუდვაა.
დოლიძე აცხადებს, რომ "ოცნების" არგუმენტი პოლიტიკურ მიკერძოებულობასთან დაკავშირებით მიუღებელია, რადგან ISFED არასდროს ყოფილა არცერთი პარტიის მხარეს.
"ხელისუფლებამ, მმართველმა პარტიამ ამ შემთხვევაში, გადაწყვიტა, რომ სამართლიანი არჩევნები არ იყოს ამ ჯგუფში, რაც ძალიან სამწუხაროა და ჩვენთვის გაუგებარი და აუხსნელია. მგონია, რომ ეს წარმოადგენს სამოქალაქო ორგანიზაციის უფლების შეზღუდვას და დევნას, მისი აზრის გამო, იმის გამო, რომ ჩვენი ორგანიზაცია ხშირად არის ხოლმე კრიტიკული. და ალბათ ეს არის მიზეზი, თუ რატომ ფიქრობენ ისინი, რომ "სამართლიანი არჩევნები" არ უნდა იყოს ამ ჯგუფში", - თქვა დოლიძემ.
მისი განცხადებით, "სამართლიანი არჩევნები" 27 წელია მაღალი რეპუტაციით სარგებლობს და გააჩნია ექსპერტიზა, რომელიც ქვეყანას საარჩევნო რეფორმის გატარებაში დაეხმარება. დოლიძე აცხადებს, რომ მათი დაბლოკვა ევროპული ინტეგრაციის პროცესს აზიანებს.
