"ჩვენი ურთიერთობები ახალ ხასიათს იძენს, მას ახალი ბიძგი მიეცა"- ამბობს ოკუპირებული აფხაზეთის ე.წ. პრეზიდენტი ასლან ბჟანია, აფხაზეთში ბელარუსის პრეზიდენტის, ალექსანდრე ლუკაშენკოს ვიზიტთან დაკავშირებით.
ბჟანია იმედოვნებს, რომ ლუკაშენკო აფხაზეთის ე.წ. დამოუკიდებლობის აღიარებს და ნელ-ნელა ამ საკითხამდეც მივლენ.
"ბელარუსის რესპუბლიკის მეთაურის აფხაზეთში ჩასვლის ფაქტი ბევრ რამეზე მეტყველებს: ჩვენი ურთიერთობები ახალ ხასიათს იძენს, მას ახალი ბიძგი მიეცა. იმედი მაქვს, რომ ნაბიჯ-ნაბიჯ მივალთ აღიარებამდეც. არ მინდა ამ საკითხზე წინასწარ საუბარი, მაგრამ პირველი აგური უკვე დადებულია, ფაქტია. მე კმაყოფილი ვარ შეხვედრით," - ამბობს ბჟანია.
ცნობისთვის, 28 სექტემბერს ბელარუსის პრეზიდენტი ალექსანდრ ლუკაშენკო ოკუპირებულ აფხაზეთში ჩავიდა და ე.წ. პრეზიდენტს, ასლან ბჟანიას შეხვდა. აღნიშნულთან დაკავშირებით, ბელარუსის ელჩი საქართველოს საგარეო საქმეთა სამინისტროში დაიბარეს.
