ნიკა გვარამიას სასამართლო პროცესიდან, მოსამართლეთა კოლეგიამ "დროას" ლიდერი, ელენე ხოშტარია გააძევა. ხოშტარიას მოსამართლემ ჯერ შენიშვნა მისცა, მალევე კი სასამართლო სხდომის ხელშეშლისა და შეფერხების მცდელობისთვის, დარბაზიდან გააძევა. მიზეზი ხოშტარიას ქმედება გახდა, რომელიც პროკურორთან მივიდა შეკითხვით - "ნამდვილი ხართ?, "ხელს მოგკიდებ".
დროას ლიდერმა მომხდარის შესახებ ფეისბუქის საკუთარ გვერდზეც დაწერა:
"დღეს ნიკა გვარამიას ნიკა გვარამიას პროცესზე მხოლოდ 15 წუთი გავძელი. ვერ ვაიძულებ თავს ის ფარსი, პროკურორის სხაპასხუპით მოყოლილო სრული სიგიჟეები, აი თვითონაც და ყველამ რომ იცის, რომ ტყუის, უბრალოდ უნდა თქვას; მოსამართლის ძალით სერიოზული სახე, ზედ კიდევ მანტია რომ მოუცვია და ამაღლებულ სკამზე დამჯდარა; დაღლილი, უემოციო, უიმედო და ენერგიაგქმოცლილი მანდატურები; მთელი ეს ფარსი, მოკლედ, ვერ ვაიძულებ სერიოზულად აღვიქვა და მეც ვიჯდე ვითომ ის წესები (ამ დროს უწესობა) მისაღებია და ნორმაა.
ხოდა, ეს პროკურორი ასე რომ ბუტბუტებდა სხდომაზე, ავდექი და მივედი, მივუახლოვდი, მაინტერესებდა ნამდვილი თუ იყო. თუ შეიძლება შეგეხები, ნამდვილი თუ ხართ თქო. კიო, ნამდვილი ვარო. მოსამართლე აღშფოთდა. იმაზე კი არ აღშფოთდა ქვეყნის ინტერესებს რომ ფეხებზე იკიდებს, ადამიანს უსამართლოდ ექცევა, ტრავმას აყენებს ხალხს, ტყუილს სერიოზული სახით ისმენს, ამ სიყალბის თავშია. ეგ არ აწუხებს.
მოკლედ, მხოლოდ 15 წუთი გავძელი და კიდევ ერთხელ ვთქვი ჩემ თავთან ეს თუ ვერ შევცვალეთ, 0 ია ჩვენი პოლიტიკური თაობის ფასი" წერს ხოშტარია
სააპელაციო სასამართლოში უკვე 3 საათზე მეტია გრძელდება ნიკა გვარამიას საქმის განხილვა. ამ წუთებში პროცესზე ბრალდების მხარის შემაჯამებელ სიტყვას ისმენენ, რომელიც პირველი ინსტანციის პოლიტიკური განაჩენის გადახედვას, და გვარამიას მიმართ კიდევ უფრო მკაცრი სასჯელის გამოტანას ითხოვს.
დღეს მხარეები დასკვნითი სიტყვით წარდგებიან მოსამართლეთა კოლეგიის წინაშე. დღესვე გახდება ცნობილი, როდის გამოაცხადებს ინსტანცია თავის გადაწყვეტილებას.
დაცვის მხარე საქმის აბსურდულობაზე მიუთითებს და ითხოვს პოლიტიკური განაჩენის საერთოდ გაუქმებას. ნიკა გვარამია 2017 წლიდან მოყოლებული აღმოჩნდა ერთადერთი გამონაკლისი 220-ე მუხლით გასამართლებულ პირებს შორის, რომელსაც სასამართლომ პატიმრობა შეუფარდა.
