"მთავარი არხის" ინფორმაციით, ორწლიანი ძებნის შემდეგ, ბადრი ესებუა დააკავეს. ჩვენი ინფორმაციით, ესებუა ზუგდიდში გამთენიისას აიყვანეს, სავარაუდოდ, მაშინ, როცა აფხაზეთის დროებით ოკუპირებულ ტერიტორიაზე გადასვლას გეგმავდა.
ჯერჯერობით მისი დაკავების შესახებ ინფორმაცია ცნობილი არ არის ადვოკატისთვისა და ოჯახისთვის. "მთავარი არხის" გადამღები ჯგუფი დეტალებს ამ წუთებშიც ადგილზე არკვევს და უფრო მეტ ინფორმაციას ესებუას დაკავების შესახებ შემდეგ გამოშვებაში მოგიყვებით.
ესებუა 2020 წლის 21 ოქტომბერს ზუგდიდში, "საქართველოს ბანკის" შენობაში შეიარაღებული შეიჭრა და ათობით მძევალი აიყვანა. ის ნახევარ მილიონ დოლარს და ადგილის უსაფრთხოდ დატოვებას ითხოვდა. რამდენიმესაათიანი სპეცოპერაციისა და მოლაპარაკების შემდეგ, ესებუამ მძევლები გაათავისუფლა, ოფიციალური ინფორმაციით, ნახევარი მილიონი ლარი წაიღო და მიიმალა. შსს ამბობდა, რომ ის საქართველოს ტერიტორიაზე რჩებოდა და ქვეყანა არ დაუტოვებია.
ავტორი: ემა გოგოხია.
