ამერიკელი სენატორი ჯინ შაჰინი ამბობს, რომ საქართველოში ოფიციალური ვიზიტის ფარგლებში გამართულ შეხვედრებზე ბიძინა ივანიშვილს საუბარი დეოლიგარქიზაციის მოთხოვნის კონტექსტში შეეხო. ამასთან დაკავშირებით შაჰინმა "რადიო თავისუფლებასთან" ინტერვიუში ისაუბრა.
"დიახ, ჩვენ წამოვჭერით მისი [ბიძინა ივანიშვილის] საკითხი დეოლიგარქიზაციის მოთხოვნის კონტექსტში, როგორც იმ 12 პრინციპის ნაწილი - დე-ო-ლი-გარ-ქი-ზა-ცი-ა. მიჭირს ამ სიტყვის წარმოთქმა", - თქვა შაჰინმა.
"რადიო თავისუფლების" ჟურნალისტმა შაჰინს ჰკითხა, რა პოზიცია ჰქონდა ირაკლი ღარიბაშვილს ამ თემასთან დაკავშირებით: "მხოლოდ მოგისმინათ, უკომენტაროდ?" - ჰკითხა ჟურნალისტმა.
"ჩვენ განვიხილეთ ამ პირობის მნიშვნელობა და ფაქტი, რომ მხოლოდ საქართველოში არ წამოჭრილა ეს საკითხი, არამედ უკრაინაშიც წამოიჭრა თავის დროზე, ყოფილ პრეზიდენტ ბატონ პოროშენკოსთან მიმართებით", - თქვა შაჰინმა.
შეგახსენებთ, ამერიკელი სენატორები ჯინ შაჰინი და დიკ დურბინი საქართველოში ოფიციალური ვიზიტით 20 თებერვალს იმყოფებოდნენ. ვიზიტის ფარგლებში სენატორებს შეხვედრები ჰქონდათ, საქართველოს პრეზიდენტთან, პრემიერმინისტრთან, ოპოზიციურ პარტიებთან და მესამე სექტორთან.
