"ოცნებამ" გადაიფიქრა და რუსული კანონპროექტი სესიაზე ხუთშაბათის ნაცვლად, დღეს გაიტანა

"ქართულმა ოცნებამ" გადაწყვეტილება შეცვალა და "აგენტების ამერიკული კანონპროექტის" განხილვა დღესვე დაიწყო. გუშინ, 7 მარტს, მამუკა მდინარაძემ თქვა, რომ აღნიშნული კანონპროექტი, რომელიც "ხალხის ძალის" მტკიცებით, ამერიკულის ზუსტი ანალოგია პლენარულ სხდომაზე ხუთშაბათს გავიდოდა.

"ჩვენ გვაქვს გადაწყვეტილი, რომ კანონპროექტზე, რომელზეც ასეთი სპეკულაციური ვნებათაღელვა შექმნეს ქვეყანაში, გამოგვეტანა ხუთშაბათს და გამოვიტანოთ ხუთშაბათს, თუმცა არ გამოვრიცხავთ, ხუთშაბათსაც იგივე იყოს და ე.წ. ფილიბასტერით ე.წ. ტრიუკები მოაწყონ, ამიტომ გთავაზობთ ასეთ რაღაცას, თან ჩემთვის უცნაურად, თავდაცვის კოდექსში, როგორც ამ კომიტეტის წარმომადგენლები მეუბნებიან, ბიუროსაც გადაუწყვეტია, ვერ მოესწრო, ბიუროსაც გადაუწყვეტია არ განვიხილოთ თავდაცვის კოდექსი, დღევანდელი დღე გვქონდა ამისთვის დათმობილი, გთავაზობთ, განხილვა აგენტების ამერიკული კანონის, და გავაგრძელოთ ხუთშაბათს", - თქვა მდინარაძემ. 

აღნიშნულს მოჰყვა ოპოზიციონერი დეპუტატების კრიტიკა, რადგან სხდომათა დარბაზი ხელისუფლების ოპონენტების უმრავლესობას უკვე დატოვებული ჰქონდა. დეპუტატებმა მოითხოვეს შესვენების გამოცხადებაც, რომ კოლეგების ნაწილი დარბაზში შესულიყო, თუმცა შალვა პაპუაშვილმა აღნიშნულზე უარი თქვა.

მანამდე, "ქართულმა ოცნებამ" ოპოზიციის ნაწილთან ერთად სახალხო დამცველი აირჩია.