ჩვენთან ერთად მოიპოვეთ თავისუფლება!
BBC-ის ჟურნალისტური გამოძიება ქოლ - ცენტრების სკანდალზე. სტატიის მიხედვით, თაღლითური ქსელი მთელ მსოფლიოში, მათ შორის საქართველოშიც მოქმედებდა და ამ სქემით პენსიონერების და რიგით ინვესტორების მილიარდ დოლარზე მეტი თანხაა მითვისებული.
“ბიბისი" სპეციალურ რეპორტაჟში ასაჯაროებს იმ ბიზნესმენების ვინაობას, ვინც თაღლითურ სქემაში მონაწილეობდნენ, მათ შორის ერთ-ერთი, საქართველოს თავდაცვის ყოფილი მინისტრი, დავით კეზერაშვილია. სიუჟეტში ნათქვამია, რომ BBC-მ არაერთი მტკიცებულების მოპოვება შეძლო, რომელიც თავდაცვის ყოფილ მინისტრს მილტონის ბრენდებთან აკავშირებდა. სტატიის მიხედვით, კეზერაშვილის საკუთრებაში არსებული რამდენიმე კომპანია იყენებდა კერძო სერვერს, რომლის მომხმარებლები მხოლოდ მილტონ ჯგუფის კომპანიები იყვნენ. სიუჟეტში აღნიშნულია, რომ სხვა უძრავ ქონებასთან ერთად კეზერაშვილი ფლობს კიევის საოფისე შენობას, სადაც განთავსებული იყო თაღლითური სატელეფონო ცენტრი.
"Panama Papers-ის გამოძიებაში ჩავრთეთ 5 სახელი და გვარი , 2016 წლის მასიური გაჟონვა, რომელშიც დეტალურად იყო აღწერილი ოფშორული კომპანიები, აღმოვაჩინეთ, რომ ოთხი მათგანი - ჭელიძე, გოგეშვილი, მგელაძე და ბენიამინი - ეს ადამიანები იყვნენ ნახსენები, როგორც დირექტორები ან უფროსი ფიგურები, რომლებიც დაკავშირებულნი იყვნენ ოფშორული კომპანიების ან შვილობილი კომპანიების ჯგუფებთან.
არა-მილტონური ჯგუფის კომპანიებმა გარკვეული გზებით დაგვაყენა ერთი ფიგურის გზაზე. ეს დავით კეზერაშვილია, საქართველოს მთავრობის ყოფილი წარმომადგენელი, რომელიც ორი წლის განმავლობაში მსახურობდა ქვეყნის თავდაცვის მინისტრად.
კეზერაშვილი თავდაცვის მინისტრის თანამდებობიდან გაათავისუფლეს და მოგვიანებით დაუსწრებლად გაასამართლეს სახელმწიფო თანხების- 5 მილიონ ევროზე მეტის გაფლანგვისთვის. ნასამართლობის დროს ის ლონდონში ცხოვრობდა და დიდმა ბრიტანეთმა საქართველოს მოთხოვნაზე მისი ექსტრადიციის შესახებ უარი განაცხადა.
არ არსებობდა საჯაროდ ხელმისაწვდომი დოკუმენტები, რომლებიც კეზერაშვილს აკავშირებდა მილტონამდელ ქსელთან, მაგრამ როდესაც ჩვენ გადავხედეთ პანამის დოკუმენტებს, მისი სახელი ისევ გაჩნდა, სადაც ის იდენტიფიცირებული იყო, როგორც მშობელი კომპანიის დამფუძნებელი, ან კომპანიის ერთ-ერთი მეწილე. კულისებში კეზერაშვილი იმ ქსელის ცენტრში ჩანდა." ნათქვამია საგამოძიებო რეპორტაჟში.
რაც შეეხება ტელეკომპანია "ფორმულას" პოზიციას:
ე.წ ქოლ-ცენტრების საქმეზე BBC-ის პლატფორმაზე გამოქვეყნდა საგამოძიებო სტატია. პუბლიკაციაში ვკითხულობთ, რომ ბრიტანულმა გამოცემამ ვერ აღმოაჩინა ე.წ. ქოლ-ცენტრების საქმეში დავით კეზერაშვილის მონაწილეობის პირდაპირი მტკიცებულებები. სტატიის მიხედვით, საჯაროდ არ მოიპოვება დოკუმენტები, რომლებიც კეზერაშვილისა და ოფშორული კომპანიების ქსელთან კავშირს დაადასტურებდა. ავტორი ვარაუდობს, რომ კეზერაშვილი ამ ქსელის ხელმძღვანელია და ამ საქმეში "ფორმულას" დამფუძნებლის სავარაუდო მონაწილეობის მტკიცებულებად, გამოცემა ასახელებს მილტონ ჯგუფის ყოფილ თანამშრომლებს, არაიდენტიფიცირებად პირებს, რომლებმაც ჟურნალისტებს ინფორმაცია კეზერაშვილის შესახებ მიაწოდეს. სტატიაში ვკითხულობთ, რომ ბრალდებები დავით კეზერაშვილის ადვოკატებმა კატეგორიულად უარყვეს. თაღლითობაში მონაწილეობას „ბიბისისთან“ ინტერვიუში უარყოფენ გამოძიებაში მოხსენიებული სხვა პირებიც. სტატიას 4 ავტორი ჰყავს. მათ შორის არის tHE TIMES OF ISRAEL-ის ჟურნალისტი სიმონა ვეინგლასი, რომელმაც სტატია ამ თემაზე ჯერ კიდევ 2020 წელს დაწერა, სადაც ვკითხულობთ, რომ ორგანიზებული დანაშაულისა და კორუფციის გაშუქების პროექტმა ვერ აღმოაჩინა მტკიცებულება იმისა, რომ კეზერაშვილი ქოლ-ცენტრთან იყო დაკავშირებული.
არსებული ინფორმაციით, BBC-ის საგამოძიებო სიუჟეტზე დავით კეზერაშვილი განცხადების გაკეთებას გეგმავს.
