აქონდროპლაზიის დიაგნოზის მქონე ბავშვების მშობლები პრემიერთან შეხვედრას ითხოვენ. ამ მიზნით მათ ღამე კანცელარიის შენობასთან გაათენეს. პროტესტის ამ ფორმას მშობლებმა მას შემდეგ მიმართეს, რაც პარლამენტში, ჯანდაცვის მინისტრთან შეხვედრამ სასურველი შედეგი არ მოიტანა. ზურაბ აზარაშვილმა თქვა, რომ მოთხოვნილ მედიკამენტს არცერთი ქვეყანა არ აფინანსებს.
მშობლები რამდენიმე თვეა აქციას მართავენ და ითხოვენ მედიკამენტ ვოზორიტიდის ქვეყანაში შემოტანას და დაფინანსებას. საუბარია 2 მილიონი ლარის დაფინანსებაზე სულ 16 ბავშვისთვის. ამ მედიკამენტის გარეშე აქონდროპლაზიის დიაგნოზის მქონე ბავშვების მდგომარეობა სულ უფრო უარესდება.
"ჯგუფში არიან ბავშვები, რომელთა მდგომარეობა უკიდურესად რთულია. ამიტომ, წელიწადი და ოთხი თვეა ვერ მივაღწიეთ კონკრეტული პასუხის მიღებას ჯანდაცვის სამინისტროდან. მოვედით აქ, იმედი გვაქვს პრემიერი გამოიჩენს ყურადღებას, შეგვხვდება, მოგვისმენს", - თქვა ერთ-ერთმა აქციის მონაწილემ.
ცნობისთვის, აქონდროპლაზია გენეტიკური დაავადებაა, როცა ბავშვის სხეული ასიმეტრიულად ვითარდება და ის დაახლოებით 25 ათასიდან ერთ შემთხვევაში ვლინდება. წამალი, რომელიც ბავშვებისთვის სასიცოცხლოდ მნიშვნელოვანია დღეს საქართველოში არ შემოდის. მშობლები ამბობენ, რომ რომც შემოდიოდეს, დახმარების გარეშე, პირადი სახსრებით ვერ შეძლებენ მის შეძენას.
