რუსული მედიის ცნობით, "საქართველომ რუსეთთან ფრენები განაახლა". მედია წერს, რომ ქართულმა ავიაკომპანია Georgian Airways-მა ერევანში ტრანსფერით მოსკოვის მიმართულებით ფრენების ბილეთების გაყიდვა დაიწყო. საქმე იმაშია, რომ კომპანიის პარტნიორია გადამზიდავი Air Dilijans, რომელსაც ადრე Armenia Airlines ერქვა.
"არმენიის ავიახაზების" სახელის გადარქმევისთანავე დავიწყეთ ამ რეისის ბილეთების გაყიდვა" - ციტირებს გამოცემა "იზვესტია" Georgian Airways-ის წარმომადგენლის სიტყვებს.
კომპანიის ვებგვერდზე განთავსებული მონაცემებით, სომხეთის დედაქალაქში ტრანსფერის დრო მხოლოდ ნახევარი საათია.
შეგახსენებთ, რომ რუსეთსა და საქართველოს შორის პირდაპირი ფრენები რუსული მხარის ინიციატივით 2019 წელს შეწყდა.
