ბრიუსელში, ევროპარლამენტში მიმდინარე ასოცირების საბჭოზე, ევროპარლამენტარ მარია კალიურანდის მწვავე გამოსვლის საპასუხოდ, "ოცნების" წარმომადგენელმა მაია ბითაძემ ისაუბრა, რა ხდებოდა 2012 წლამდე ქვეყანაში.
მან ევროპარლამენტარები კრიტიკული განცხადებების გამო, პოლარიზაციის გაღრმავებაში დაადანაშაულა.
"ჩვენ ყველას გვახსოვს, რა ხდებოდა ჩვენს ქვეყანაში, სანამ ქართული ოცნება მოვიდოდა სათავეში. ჩვენ ტელეფონით საუბრისაც კი გვეშინოდა. ფაქტობრივად ყველა ოჯახი იყო დაზარალებული. ფაქტობრივად ყველა ოჯახის ერთი წევრი მაინც იჯდა ციხეში, იყო წამების მსხვერპლი და ჩვენ არ გაგვიგია განსაკუთრებული შეშფოთება ჩვენი დასავლელი პარტნიორებისგან. მე იმედი მაქვს, რომ საქართველო მიიღებს კანდიდატის სტატუსს და ეს შეამცირებს ქვეყანაში პოლარიზაციას, იმიტომ რომ ჩვენი ევროპელი პარტნიორების განცხადებები პოლარიზაციის ზრდად უწყობს ხელს." თქვა ბითაძემ.
ევროპარლამენტარმა კი მას პრემიერ ღარიბაშვილის ანტიდასავლური რიტორიკა შეახსენა და მისი ერთ-ერთი გამოსვლიდან ციტატაც მოიყვანა:
"მე მინდა მოგიყვანოთ თქვენი პრემიერმინისტრის ციტატა ინტერვიუდან, რომელიც მან ტელეკომპანია იმედს მისცა. „ევროპარლამენტმა საკუთარ თავს მიხედოს. ნუ გვკარნახობს, რა უნდა გავაკეთოთ ჩვენ. ისინი ცდილობენ, რომ საქართველო ომში ჩაითრიონ“. მე აქ კიდევ მაქვს უამრავი ციტატა და შემიძლია წავიკითხო ყველა. როდესაც ჩვენ ვსაუბრობთ ანტიდასავლურ რიტორიკაზე, ეს კონკრეტული ფაქტებიდან გამომდინარეა და ჩვენი მოგონილი არ არის. რაც შეეხება იმას, რომ ჩვენი დისკუსია იწვევს პოლარიზაციას საქართველოში, მინდა გირჩიოთ, რომ ნუ აბრალებთ სხვებს, ჩაიხედეთ სარკეში" მიმართა ევროპარლამენტარმა "ოცნების" წარმომადგენელს.
შეგახსენებთ, ბრიუსელში დღეს ასოცირების საბჭოს სხდომაზე, საქართველოს მხრიდან, 12 რეკომენდაციის შესრულებაზე მსჯელობენ. სხდომაზე მწვავე განცხადებები გააკეთა მარია კალიურანდმა და აღნიშნა, რომ პროგრესი 12 პრიორიტეტის მიმართულებით არის არასრული და ხშირად ზედაპირული. მან ამის მიზეზებიც დაასახელა და აღნიშნა, რომ დასავლელი პარტნიორები უკვე დაიღალნენ საქართველოს ხელისუფლების მხრიდან იმის მოსმენით, რომ თითქოს ევროპას საქართველოს ომში ჩათრევა უნდა.
