IDF აცხადებს, რომ 7 ოქტომბერს კიბუცსა და რამდენიმე სოფელზე თავდასხმის ორგანიზატორი მოკლეს
გამოქვეყნდა:
ისრაელის თავდაცვის ძალები აცხადებს, რომ 7 ოქტომბერს კიბუცსა და რამდენიმე სოფელზე თავდასხმის ორგანიზატორი მოკლეს. გავრცელებული ინფორმაციით, საუბარია ნასიმ აბუ აჯინაზე, რომელიც ისრაელის მიერ განხორციელებული იერიშის დროს დაიღუპა.
ისრაელის თავდაცვის ძალების ინფორმაციით, ის ასევე მეთვალყურეობდა "ჰამასის" უპილოტო საფრენი აპარატების გამართულობას.
"მისი სიკვდილი შეაფერხებს "ჰამასის" წინააღმდეგობას", - აცხადებს ისრაელის თავდაცვა.
ინფორმაცია "ჰამასს" ჯერჯერობით არ დაუდასტურებია.
შეგახსენებთ, რომ 7 ოქტომბერს, ღაზას სექტორიდან ისრაელზე მოულოდნელი სარაკეტო და სახმელეთო თავდასხმა წამოიწყეს. თავდასხმაზე პასუხისმგებლობა ტერორისტულმა დაჯგუფება "ჰამასმა" აიღო და მას ოპერაცია "ალ-აკსას შტორმი" უწოდა. სარაკეტო იერიშის საპასუხოდ ისრაელის თავდაცვის სამინისტრომ საომარი მდგომარეობა და ოპერაცია "რკინის ხმლების" დაწყება გამოაცხადა.
