შეერთებულ შტატებში რუსეთის სამი მოქალაქე რუსეთში სანქციების გვერდის ავლით ელექტროტექნიკის განსაკუთრებით დიდი მასშტაბის კონტრაბანდის გამო დააკავეს. ინფორმაციას იუსტიციის დეპარტამენტზე დაყრდნობით უკრაინული მედია ავრცელებს.
პროკურატურა დაკავებულთათვის წინასწარი პატიმრობის შეფარდებას ითხოვს და მიმალვის საფრთხეზე საუბრობს. გამოძიების მტკიცებით, სამი ბრალდებული იყენებდა ბრუკლინში რეგისტრირებულ ორ იურიდიულ პირს რუსული სანქცირებული კომპანიებისთვის ორმაგი დანიშნულების ელექტრონიკის უკანონოდ მიწოდების, შესყიდვისა და გაგზავნისთვის.
პროკურატურის ცნობით, ერთი წლის განმავლობაში დაკავებულებმა გადაზიდეს 300-ზე მეტი ერთეული აკრძალული საქონელი, რომელთა საერთო ღირებულება დაახლოებით 10 მილიონი აშშ დოლარია. კონტრაბანდული საქონლის მნიშვნელოვანი ნაწილი რუსეთის თავდაცვის საჭიროებებს მოხმარდა.
ელექტრონული კომპონენტებისა და ინტეგრირებული სქემების ნაწილი, რომელთა ნაწილი რუსეთში შეიტანეს, მოგვიანებით უკრაინაში რუსულ აღჭურვილობაში აღმოაჩინეს - კერძოდ, Thorne-MDM რადიო დაზვერვის კომპლექსში, RB-301B Borisoglebsk-2-ში, Izdeliye 305E მრავალფუნქციურ მართვად რაკეტაში, Ka-52 ვერტმფრენებში, Orlan-10 თვითმფრინავებსა და T-72B3 საბრძოლო ტანკებში.
გამოძიების ინფორმაციით, ნიკოლაი გოლცევი იღებდა შეკვეთებს რუსული კომპანიებისგან შეერთებულ შტატებში საქონლის შესაძენად, რის შემდეგაც მწარმოებლებსა და მიმწოდებლებს ფსევდონიმით უკავშირდებოდა. სალიმჯონ ნასრიდინოვსა და გოლცევს საქონელი გადაჰქონდათ სხვადასხვა შუამავალ კომპანიებში, კერძოდ თურქეთში, ჩინეთში, ინდოეთსა და არაბეთის გაერთიანებულ საემიროებში, საიდანაც ისინი რუსეთში შედიოდა. კრისინა პუზირევა კი მართავდა საბანკო ანგარიშებს და ახორციელებდა ფინანსურ ოპერაციებს.
