რეალური საფრთხე უვიზო მიმოსვლისთვის - ევროპელი დეპუტატების სიტყვიერი გაფრთხილება უკვე პოლიტიკურ რეკომენდაციად იქცა. საგანგებო რეზოლუციაში, რომელსაც დღეს უყარეს კენჭი, ნათქვამია, რომ საქართველოს მოქალაქეებმა შესაძლოა დაკარგონ უვიზო მიმოსვლა თუ ხელისუფლება რუსულ კანონს მიიღებს - ეს არის კონკრეტული მუქარა, რომლის აღსრულება ევროკომისიას დაეკისრება.
ევროპულ რეზოლუციაში, რომელიც "ოცნების" ხელისუფლების უკიდურესი შეშფოთების მიზეზი გახდა, ქართული პოლიტიკის ორი მთავარი აქტორიც მოხვდა - სტრასბურგში ივანიშვილის სანქცირება და სააკაშვილის სამკურნალოდ გათავისუფლება მოითხოვეს. საქართველოს ხელისუფლებას აფრთხილებენ, რომ რუსული კანონი მომავალ ურთიერთობებსაც ბლოკავს და შეუძლებელს ხდის წევრობაზე მოლაპარაკებების დაწყებას.
