საქართველოს მარიონეტების პატრონი მოსკოვისკენ ტრიალდება - ამ სათაურით "ქართული ოცნების" საპატიო თავმჯდომარე ივანიშვილზე და საქართველოში განვითარებულ მოვლენებზე სტატიას აქვეყნებს Financial times.
სტატიაში ნათქვამია, რომ "ოლიგარქი ბიძინა ივანიშვილი ცდილობს კავკასიური ერი რუსეთის ორბიტაზე დააბრუნოს". გამოცემა წერა, რომ ოლიგარქი, რომლის ქონება 5 მილიარდი დოლარია, რაც ქვეყნის მშპ-ს ერთი მესამედის ტოლია, ძალაუფლებას, დიდწილად კულისებს მიღმა ფლობდა.
"თუმცა, გასულ კვირას ის მთიდან ჩამოვიდა, რათა კონსპირაციული, ანტიდასავლური სიტყვით გამოსვლა ჰქონოდა, რომელშიც მან საქართველო წარმოადგინა, როგორც "ომის გლობალური პარტიის" და სამოქალაქო უფლებების დამცველ ჯგუფებს შორის მისი სავარაუდო აგენტების მსხვერპლი", - წერს გამოცემა.
სტატიის ავტორების შეფასებით, პრო-სამთავრობო მიტინგზე ივანიშვილის გამოსვლა, იყო მხარდაჭერის დემონსტრირება უკიდურესად საკამათო კანონი "უხოელი აგენტების" კანონის მიმართ. FT წერს, რომ კანონპროექტმა გამოიწვია ქვეყანაში ყველაზე დიდი დემონსტრაციები ბოლო ათწლეულების განმავლობაში.
"საქართველოს მთავრობის დაახლოება მოსკოვთან სამი წელია მიმდინარეობს, უკრაინის წინააღმდეგ რუსეთის ომის მიუხედავად. მაგრამ ანალიტიკოსები და მთავრობის კრიტიკოსები ამბობენ, რომ უცხოური აგენტების კანონი და ივანიშვილის გამოსვლა, რომელშიც ის კრემლის ხაზებს იმეორებდა, გარდამტეხ მომენტს ნიშნავს და რომ ყოფილი საბჭოთა რესპუბლიკა ახლა ისევ რუსეთის ორბიტაზე ბრუნდება", - წერია სტატიაში.
სტატიაში ნათქვამია, რომ ის, რასაც ხელისუფლება აკეთებს, შესაძლოა განპირობებული იყოს იმით, რომ როგორც ბევრი რუსი ოლიგარქის შემთხვევაში, ივანიშვილის ბიზნეს ინტერესებსაც საფრთხე ემუქრება, თუ ის კრემლის ხაზს არ დაემორჩილება. კიდევ ერთი შესაძლო ახსნა, არის ის, რომ ივანიშვილი რეაგირებდეს ევროკავშირის მოთხოვნაზე - საქართველომ მკვეთრად შეზღუდოს ოლიგარქების გავლენა, გაწევრიანებაზე მოლაპარაკებების დაწყებამდე. სტატიაში ასევე აღნიშნულია, რომ არჩევნების მოახლოებასთან ერთად ივანიშვილი იყენებს უნგრელი ვიქტორ ორბანის ტაქტიკას - ახდენს პოლიტიკური დებატების პოლარიზაციას, შიდა ოპონენტებს უცხოეთის აგენტებად აცხადებს და იყენებს კულტურულ საკითხებს, რათა სოციალურად კონსერვატიული ქართველების, განსაკუთრებით კი სოფლად მცხოვრებთა გული მოიგოს.
გამოცემა ამბობს, რომ მათ კომენტარის მიღება ივანიშვილისგანაც სურდათ, თუმცა მან თხოვნას არ უპასუხა.
