კრემლის მხარდაჭერით და კრემლთან სინქრონში მოქმედება - ეს არის მთავარი ბრალდება, რომელიც დღეს ოფიციალურად დაფიქსირდა ეუთოს დოკუმენტში. ბუქარესტში გამართულ ასამბლეაზე ორგანიზაციამ მიიღო დეკლარაცია, რომელშიც სწორედ ასეა შეფასებული "ქართული ოცნების" ქმედება, რასაც შედეგად საქართველოში დემოკრატიის დაზიანება მოჰყვა. მმართველი პარტიის დელეგაციამ ამ დეკლარაციას, რა თქმა უნდა, ხელი არ მოაწერა და მაშველად ისევ კრემლი გამოიყენა. არადა მოსკოვის მოთხოვნით გაკეთებული ჩანაწერი, რომელზეც საქართველოს ხელისუფლების წარმომადგენლები აპელირებდნენ, სულ ცოტა ხანში სრულად გაქრა დოკუმენტიდან.
