ომბუდსმენი ბრეგაძეს: შეიცვალოს რუსულ კანონთან დაკავშირებული ბრძანება, დეკლარაციებში მითითებულ ფიზიკურ პირთა პერსონალური მონაცემები არ გასაჯაროვდეს
გამოქვეყნდა:
30 აგვისტოს სახალხო დამცველმა იუსტიციის მინისტრს რუსული კანონის გამო შექმნილ რეესტრში რეგისტრაციის ვალდებულების მქონე ორგანიზაციებში დასაქმებულ პირთა პერსონალური მონაცემების დისკრიმინაციული ხელყოფის თავიდან აცილების თაობაზე ზოგადი წინადადებით მიმართა.
ომბუდსმენი აცხადებს, რომ პერსონალური მონაცემების საჯაროდ გამოქვეყნება გაუმართლებელია და ზიანის მომტანია, აქვს ძლიერი შემბოჭველი, მსუსხავი და მასტიგმატიზირებელი ეფექტი იმ ორგანიზაციებში დასაქმებულ პირთა საქმიანობაზე, რომლებსაც ეს კანონი ეხებათ.
საქართველოს სახალხო დამცველი მიმართავს იუსტიციის მინისტრს, ცვლილებები შეიტანოს ზემოაღნიშნულ ბრძანებაში, რათა რეგისტრაციის ვალდებულების მქონე ორგანიზაციების მიერ წარდგენილ დეკლარაციებში მითითებულ ფიზიკურ პირთა, მათ შორის, დასაქმებულთა პერსონალური მონაცემები საჯაროდ გამოქვეყნებას არ დაექვემდებაროს.
"სახალხო დამცველმა შეაფასა იუსტიციის მინისტრის 2024 წლის 1 აგვისტოს №1019 ბრძანების დისკრიმინაციულობის საკითხი, რომელიც ეხება „უცხოური ძალის ინტერესების გამტარებელ ორგანიზაციათა რეესტრის წარმოების, საფინანსო დეკლარაციის წარდგენისა და მონიტორინგის წესის“ დამტკიცებას. აღნიშნული კანონქვემდებარე აქტის საფუძველზე, უცხოური ძალის ინტერესების გამტარებელ ორგანიზაციათა რეესტრში რეგისტრაციის ვალდებულების მქონე ორგანიზაციების მიერ საფინანსო დეკლარაციაში ასასახი, როგორც დასაქმებულთა, ასევე მოკლევადიანი შრომითი ურთიერთობის ფარგლებში დაქირავებული ექსპერტების, ბენეფიციარების და სხვა პირთა პერსონალური მონაცემები (სახელი, გვარი, პირადი ნომერი და საბანკო ანგარიშის ნომერი, სხვ.) საჯაროდ გამოქვეყნებას ექვემდებარება.
სახალხო დამცველის შეფასებით, მინისტრის ბრძანებით დადგენილი არსებული მონიტორინგის მექანიზმი, პერსონალურ მონაცემებზე ხელმისაწვდომობის ნაწილში, სახელმწიფოს მხრიდან თვითნებობის მაღალ რისკს ქმნის. პერსონალური მონაცემების საჯაროდ გამოქვეყნება გაუმართლებელია და ზიანის მომტანია, აქვს ძლიერი შემბოჭველი, მსუსხავი და მასტიგმატიზირებელი ეფექტი უცხოური ძალის ინტერესების გამტარებელ ორგანიზაციათა რეესტრში რეგისტრაციის ვალდებულების მქონე ორგანიზაციებში დასაქმებულ პირთა საქმიანობაზე.
სახალხო დამცველი მიიჩნევს, რომ ყველა ასეთ საქმეში, ხელისუფლებაზე დაკისრებულია მძიმე ტვირთი, გაამართლოს შესაბამისი შეზღუდვის აუცილებლობა", - წერია განცხადებაში.
რუსული კანონი ძალაში 3 ივნისიდან შევიდა, მიუხედავად მასშტაბური საპროტესტო გამოსვლებისა და საერთაშორისო პარტნიორების მხრიდან მოწოდებებისა, უკან გაეწვიათ ის. რეესტრში ნებაყოფლობით რეგისტრაციის ვადა ორგანიზაციებისთვის 2 სექტემბერს იწურება. კანონის მიხედვით, ორგანიზაციები, რომლებიც დაფინანსების 20%-ზე მეტს უცხოეთიდან იღებენ "უცხოური ძალის ინტერესების გამტარებლად" აცხადებს და მათ ავალდებულებს რუსული კანონის გამო შექმნილ რეესტრში დარეგისტრირდნენ. რეგისტრაციისთვის თავის არიდება პირველ ჯერზე გამოიწვევს დაჯარიმებას 25 000 ლარის ოდენობით, გარდა ამისა, ორგანიზაციებს, მათი ნების საწინააღმდეგოდ, მაინც დაარეგისტრირებენ.
ამ კანონის გამო შეჩერდა ევროინტეგრაციის პროცესი. ამერიკამ საქართველოს ხელისუფლებას სანქციები დაუწესა.
