ოპოზიციისთვის მიკუთვნებულ ბიულეტენებს საეჭვოდ ცნობდნენ და აბათილებდნენ - ივანე ბურდული 

"ცესკოს" ყოფილი თანამშრომელი, ივანე ბურდული ამბობს, რომ 2020 წლის 31 ოქტომბრის არჩევნებზე  ბათილი ბიულეტენების რაოდენობა ძალიან მაღალი იყო. ბურდულის თქმით, ოპოზიციური პარტიებისთვის მიკუთვნებულ ბიულეტენებს კომისიის რომელიმე წევრი საეჭვოდ ასახელებდა, შემდეგ კომისიის წევრები ერთობლივად განიხილავდნენ და ხმათა უმრავლესობით, ბათილად ცნობდნენ. ამის შესახებ მან "მთავარი არხის" ეთერში, გადაცემაში, "დღის სტუმარი" ისაუბრა. 

ბუდულის თქმითვე, ბიულეტენების ეჭვის საფუძველი შეიძლება ნებისმიერი რამ გამხდარიყო. 

"სამწუხაროდ, ჩვენს კანონმდებლობაში სწორედ ეს მომენტია, რომ ეჭვის საფუძველი ჩვეულებრივად შემოხაზულიც შეიძლება გახდეს და მაგაზეც შეიძლება თქვას რომელიმე წევრმა, რომ მოდი, ეს საეჭვოებში გადავდოთ და მერე ვუყაროთ კენჭი. მერე უკვე კომისიის ხმებზეა დამოკიდებული, შეუძლიათ უყარონ, როგორც ბათილი", - თქვა ივანე ბურდულმა. 

ივანე ბურდული გადაცემაშივე ამბობს, რომ თითქმის ყველა შემთხევაში, კომისიამ ბათილად მიიჩნია ბიულეტენი, სადაც ამომრჩეველს ერთი ციფრი ჰქონდა გადახაზული და მეორე - შემოხაზული. მისივე თქმით, ასეთ შემთხვევაში ამომრჩევლის ნება გამოხატულია და ამიტომ კომისიას ასეთი ხმები უნდა დაეცვა.

რაც შეეხება საჩივრებს, ცესკოს ყოფილი თანამშრომელი ამბობს, რომ მიმდინარე არჩევნებზე რამდენიმე ასეული საჩივარი, სადაც არსებით დარღვევაზე იყო საუბარი, განხილვის გარეშე დარჩა. 

"საოლქო საარჩევნო კომისია მხოლოდ საჩივრების მოშორებაზე იყო გადასული და არა მათ რეალურად განხილვაზე" - ივანე ბურდული. 

ცნობისთვის, ივანე ბურდული, ამომრჩეველთა ბინაზე არარსებული, უცხო პირების მიწერას იუსტიციის სამინისტროს უკავშირებს.

ამასთან, ამბობს, რომ ოქმებში არსებული უზუსტობების რაოდენობა და დისბალანსის ხელით ჩასწორების მცდელობა არჩევნების გაყალბების საფუძვლიან ეჭვს ბადებს.

აქვე შეგახსენებთ, რომ ივანე ბურდული "ცესკოში" საარჩევო კომისიებთან ურთიერთობის დეპარტამენტის უფროსი სპეციალისტი და 5 ოლქის კოორდინატორი იყო. მან თანამდებობა არჩევნების მასშტაბური გაყალბების გამო დღეს, 6 ნოემბერს დატოვა.