პანდემია პროტესტის ჩასახშობად-ტიკარაძე და გამყრელიძე ოპოზიცია აქციების შეწყვეტისკენ მოუწოდებენ

პოლიტიკური ტემპერატურის დასაწევად "ქართული ოცნება" ისევ კორონაკრიზისს იყენებს და ოპოზიციას მოუწოდებს საპროტესტო აქციებზე უარი თქვას. 

ოპონენტებზე შტურმისთვის დღეს მთავრობამ ჯანდაცვის მინისტრი და დაავადებათა კონტროლის ეროვნული ცენტრის ხელმძღვანელი გამოიყვანა. 

ცეკსო-სთან, როდესაც უკვე ეპიდემია პიკში იყო, "ოცნების" ხელისუფლებამ მშვიდობიანი მომიტინგეების წინააღმდეგ ცივი წყლის ჭავლი გამოიყენა. რამდენად დასაშვებია ეპიდემიის დროს ამ ფორმით აქციის დაშლა? -3 კვირის წინ ეს კითხვა, არც ჯანდაცვის მინისტრს და არც დაავადებათა კონტროლის ეროვნული ცენტრის ხელმძღვანელს არ დაუსვამთ და არც გაუპროტესტებიათ. 

ოპოზიცია მათ მოუწოდებს, შერჩევით მიდგომას თავი დაანებონ და ბოლომდე ნუ გახდებიან
"ოცნების" პარტიული მუშაკები. 

გაყალბებული არჩევნების გამო დაწყებული პროტესტის ჩასახშობად "ოცნება" ყველა გზას მიმართავს, მაგრამ ქვეყნის მასშტაბით აქციებს ვერ აჩერებს და ვერც ოპოზიციის გეგმებს ცვლის. ბათუმი და თბილისი დემონსტრაციების ეპიცენტრია.

ოპოზიციამ დღეს შეათანხმა ის სამოქმედო გეგმაც, რომელითაც "ოცნებას"- ერთპარტიული პარლამენტის პირველი სხდომის დღეს უპასუხებს. 

ყველა ოპოზიციური პარტია მეტეხთან შეიკრიბება და შეთანხმების სამ მემორანდუმს მოაწერს ხელს. ოპონენტები ოლიგარქს უარს ეტყვიან პარლამენტში შესვლაზე, საპარლამენტო მანდატებზე და განმეორებითი არჩევნების ჩატარებას მოითხოვენ. 

ოპოზიციას არ აქვს იმედი, რომ თუ ოპოზიციასა და ხელისუფლებას შორის მესამე რაუნდი შედგება, ის რაიმე შედეგით დასრულდება და ბიძინა ივანიშვილი რაიმე დათმობაზე წავა. თუმცა ამბობენ, რომ მოლაპარაკების ფანჯარა ჯერ დახურული სრულად არ არის და ხელახალი არჩევნების ჩატარება "ოცნებას" გაზაფხულზე მაინც მოუწევს.