პაატა იმნაძის გამდიდრება დეკლარაციაში ჯერ არ ასახულა - მილიონნახევარი ერთერთი მუშკეტერისთვის

ჭავჭავაძის 60 ნომერში, ერთერთი ყველაზე ძვირადღირებული ახალაშენებული 22 სართულიანი კორპუსი მდებარეობს. "ჰაუსართ პლაზამ" კორპუსი ახლახანს დაასრულა და ბოლომდე შესახლებული ჯერ არ არის. სახლი ექსკლუზიურია, რომელმაც აქ მცხოვრებლებს თავი განსაკუთრებულად და გამორჩეულად უნდა აგრძნობინოს - იზოლირებული ინფრასტრუქტურით, ბრენდირებული მასალებით და პანორამული ხედებით. აქ კვადრატულის ღირებულება კომფორტის შესაბამისი - 2000 დოლარია, რაც მაღალია სართული, ფასიც შესაბამისად იზრდება.

მე-17 სართულზე, 200 კვადრატამდე ბინის მფლობელი, პაატა იმნაძეა. როგორც ჩანს, სამი მუშკეტერიდან ერთერთი ფუფუნებისა და ძვირადღირებული ცხოვრების მოყვარულია. დაავადებათა კონტროლის ცენტრის ხელმძღვანელის მოადგილემ ბინაში თითქმის მილიონ ნახევარი ლარი გადაიხადა.

2020 წლის 3 მარტს, იმ დროს, როცა დეკლარაცია შეავსო, ბინა უკვე პაატა იმნაძის მფლობელობაში იყო, თუმცა, გაურკვეველი მიზეზების გამო დამალა. ფინანსური დანაზოგი რომ აქვს, ოფიციალურ დოკუმენტში არ დაუმალავს, მაგრამ გამოვითვალეთ და დავადგინეთ, რომ ხელფასის ოფიციალური მონაცემების მიხედვით, პაატა იმნაძეს ამ სახლის შესაძენად -15 წელი უნდა ემუშავა. თუმცა, ბინის შეძენა, რემონტი და საცხოვრებლად გადასვლა მეუღლესთან ერთად სულ რამდენიმე თვეში მოახერხა.

პაატა იმნაძე არ უარყოფს, რომ ბინა მის მფლობელობაშია, თუმცა, გვითხრა, რომ ბინა მეუღლემ ხათუნა გოგელიამ შეიძინა და ჯერ გაფორმებული არ აქვს. გაუკვირდა ისიც, რომ მეუღლესა და მის შემოსავლებს არ ვიცნობდით. ქალბატონი ხათუნა კი ამბობს, რომ ბინა საჩუქარია.

შაბათის მთავარმა გაარკვია, რომ კომპანიას, რომელმაც პაატა იმნაძეს, ოცნების სახლი აუშენა, კიდევ ერთი სერვისი აქვს.  გაყიდვების დეპარტამენში გვითხრეს, რომ შეუძლიათ, ბინა არ გადააფორმონ მყიდველზე იმ შემთხვევაში თუ მფლობელს სურს დამალოს ქონება.

"საჯარო დაწესებულებაში ინტერესთა შეუთავსებლობისა და კორუფციის შესახებ" კანონით პაატა იმნაძე  ვალდებულია, სხვა ინფორმაციასთან ერთად, ქონებრივ დეკლარაციაში მიუთითოს ნებისმიერი შემოსავალი ან გასავალი, რომელიც 1500 ლარს აღემატება, თუმცა გაურკვეველი წარმომავლობის ფულის თუ ქონების შესახებ ჩინოვნიკების მსგავსად ნაცად ხერხს, ქონების დამალვას მიმართა. 

პაატა იმნაძის ქონებრივ დეკლარაციაში სახლებისა და აგარაკების რაოდენობა წლიდან წლამდე იზრდება, თითოეულის სავარაუდო ღირებულებაც სოლიდურია, ფინანასური დანაზოგიც რამდენიმე ათასი დოლარია. იყო დრო, როცა პაატა იმნაძე დანაზოგებს ლარში უთითებდა, თუმცა, როგორც ჩანს, ვალუტის კურსის ცვლილებასთან ერთად ის თანხის შენახვას დოლარში ამჯობინებს.