გერმანიის საგარეო საქმეთა მინისტრი, ჰაიკო მაასი, ალექსეი ნავალნის დაკავებასთან დაკავშირებით ტვიტს ავრცელებს.
"ნავალნის დაკავება სრულიად გაუგებარია. კანონიერება და სამოქალაქო უფლებების დაცვა - რისი იძულებაც რუსეთს კონტიტუციითა და საერთაშორისო ვალდებულებებით აქვს - მასაც უნდა შეეხოს. სასწრაფოდ უნდა გათავისუფლდეს".
შეგახსენებთ, რომ "ნოვიჩოკის" ნერვული აგენტით მოწამვლის შემდეგ რუსი ოპოზიციონერი სამკურნალოდ გერმანიაში გადაიყვანეს. გუშინ ის სამშობლოში სწორედ ბერლინიდან დაბრუნდა.
სხვა განცხადებები დაკავებაზე:
- ბორელი: რუსეთის ხელისუფლებამ პატივი უნდა სცეს ნავალნის უფლებებს და გაათავისუფლოს
- თავდაჯერებული ლიდერები ვერ ხედავენ ოპონენტებზე ძალადობის საჭიროებას - პომპეო
ცნობისთვის, 17 იანვარს ალექსეი ნავალნი - მოწამვლის შემდეგ პირველად - რუსეთში ჩავიდა. ოპოზიციონერი ჩაფრენამდე დარწმუნებული იყო, რომ დააკავებდნენ. დაკავებულები არიან მისი მხარდამჭერებიც, რომლებიც ნავალნის აეროპორტში ელოდებოდნენ.
რუსი სამართალდამცავების მტკიცებით, ოპოზიციონერს ბრალად ედება გაფლანგვა. ჯერ კიდევ 2014 წელს ალექსეი ნავალნი და მისი ძმა დამნაშავედ ცნეს თაღლითობაში. გამოძიების მტკიცებით, ძმებმა "ივ როშე" დაარწმუნეს, გაეფორმებინათ არახელსაყრელი კონტრაქტი. თავის მხრივ, პუტინის კრიტიკოსი ამტკიცებს, რომ ეს პოლიტიკურად მოტივირებული საქმეა მის წინააღმდეგ და პუტინი გამოგონილი ბრალდებებით ცდილობს მის შეჩერებას.
საბოლოოდ, ნავალნი მოსკოვში ჩასვლისთანავე დააკავეს; მის ადვოკატს კი, რომელსაც პოლიტიკოსის დოკუმენტაცია ეკავა, მათ შორის, სასამართლო გადაწყვეტილებები, ოპოზიციონერთან ერთად წასვლის უფლება არ მისცეს.
