ევროპარლამენტში დღეს საქართველოში არსებულ პოლიტიკურ კრიზისზე იმსჯელებენ
გამოქვეყნდა:
საქართველოში არსებულ პოლიტიკურ კრიზისზე, ევროპარლამენტში დებატები დღეს გაიმართება. სხდომაზე მოხსენებით გამოვა საგარეო და უსაფრთხოების საკითხებში ევროკავშირის უმაღლესი წარმომადგენელი, ევროკომისიის ვიცე-პრეზიდენტი ჯოზეფ ბორელი.
ოპოზიციაში არ გამორიცხავენ, რომ ევროპარლამენტარები დღეს საკმაოდ კრიტიკულ შეფასებებს გააკეთებენ. მათი თქმით, შესაძლებელია შესაბამისი რეზოლუციაც კი მიიღონ.
"ევროპარლამენტარებისთვის და ზოგადად ჩვენი დასავლელი პარტნიორებისთვის, ძალიან მნიშვნელოვანია, რომ საქართველოს ახლანდელი მდგომარეობა პოლიტიკური დიალოგის ფარგლებში გადაიჭრას. ნამდვილად ველოდები სიმწვავეს, ეს სიმწვავე მიმართული იქნება იქითკენ, რომ ხელისუფლებამ შეიმეცნოს რამდენად მნიშვნელოვანია, მოლაპარაკების მაგიდასთან დაჯდომა და პოლიტიკური შეთანხმების მიღწევა", - ამბობს, "ნაციონალური მოძრაობის" წევრი, თინა ბოკუჩავა.
დებატები ბრიუსელის დროით 15:00 საათზე დაიწყება.
დისკუსია ევროპარლამენტის ყველა პოლიტიკურმა ჯგუფმა მოითხოვა. ესენია: "ევროპის სახალხო პარტია", "მწვანეები", "ლიბერალებისა და დემოკრატების ალიანსი" და ასევე სოციალისტები, რომლის პარტნიორიც "ქართული ოცნებაა''.
