23 ოპოზიციური პარტია პოლიტიკოს გოგი წულაიას საქმესთან მიმართებაში შერჩევითი სამართალის გამოყენებასა და პოლიტიკურ მართლმსაჯულებაზე განცხადებას ავრცელებს. გავრცელებულ განცხადებაში ნათქვამია, რომ ისინი ქალთა მიმართ ძალადობის თემას სერიოზულად უყურებენ და ავტომატურად ეჭვქვეშ არ აყენებენ წარდგენილ ბრალდებებს, თუმცა ამბობენ, რომ ანალოგიურ ბრალდებებზე სასამართლო არასოდეს იყენებს აღკვეთის ღონისძიების სახით პატიმრობას.
როგორც განცხადებაშია ნათქვამი, აღნიშნული მიუთითებს, შერჩევით სამართალსა და პოლიტიკურ მოტივზე.
განცხადებაში ოპოზიციური პარტიები გოგი წულაიას დაკავების წინა პერიოდზეც საუბრობენ. კერძოდ, "ტვ პირველის" ეთერში გასული სიუჟეტის შემდეგ, სოლიდარობის ნიშნად, წულაიამ საჯაროდ შეაგინა, ბიძინა ივანიშვილის შვილს, ბერა ივანიშვილს.
"ერთ თვეზე მეტი გავიდა, მას შემდეგ, რაც საზოგადოებამ ირაკლი ღარიბაშვილის, ბერა ივანიშვილისა და ანზორ ჩუბინიძის ჩანაწერები მოისმინა. აღმაშფოთებელი იყო იმის გაგება თუ რა ფორმით და როგორ ახდენდნენ ზეწოლას, ემუქრებოდნენ და ამცირებდნენ ივანიშვილის გარემოცვის წევრები ადამიანებს, მათ შორის არასრულწლოვნებს, მხოლოდ იმისთვის რომ ბერას მიმართ კრიტიკული ან თუნდაც უცენზურო ტერმინების შემცველი პოსტი დაწერეს ფეისბუქზე. ეს ყველაფერი ივანიშვილის ვაჟის და საქართველოს სახელმწიფოს უმაღლესი თანამდებობის პირების მონაწილეობით, მათი უშუალო მითითებით ხდებოდა.
ბერა ივანიშვილმა საჯაროდ დაადასტურა ის, რაც მოქალაქეებმა ტვ პირველის მიერ გამოქვეყნებული ჩანაწერებიდან გაიგეს. საჯარო გახდა ბევრი სხვა ანალოგიური ბრალდებაც. ამ ყველაფრით პროკურატურა არ დაინტერესებულა, მათ არავინ დაუკითხავთ და არაფრის გარკვევა არ უცდიათ, გარდა ერთისა - ისინი კანონდარღვევით ცდილობდნენ ტვ პირველიდან კონფიდენციალური მასალის ამოღებას და ჩანაწერის გავრცელების პირველწყაროს გაგებას.
ეს მიუთითებს რომ მთელი სახელისუფლებო ვერტიკალი ივანიშვილის ოჯახის სადამსჯელო ჯგუფია. სწორედ ამ ჩანაწერების გამოქვეყნებას მოსდევს გოგი წულაიას დაპატიმრება, რომელმაც ჩანაწერების გამოქვეყნების შემდეგ, საჯაროდ სიმბოლური სახით გამოუცხადა სოლიდარობა მათ, ვინც ბერას კრიტიკის გამო დაისაჯა. ჩვენ ძალიან სერიოზულად ვუდგებით ნებისმიერ ბრალდებას ქალთა მიმართ ძალადობის შესახებ.
ამ განცხადებით არ ვაპირებთ, ავტომატურად ეჭვქვეშ დავაყენოთ მომჩივანის მიერ გამოთქმული ბრალდებები, მაგრამ ის ფაქტი, რომ პროკურატურის მოთხოვნით და მორჩილი სასამართლოს დასტურით, გოგი წულაიას აღმკვეთი ღონისძიების სახით წინასწარი პატიმრობა შეეფარდა, როცა ანალოგიური ბრალდებების დროს პრაქტიკულად არასდროს აღმკვეთი ღონისძიების ეს ფორმა არ გამოიყენება, უდავოდ მიუთითებს შერჩევით სამართალსა და ხელისუფლების პოლიტიკურ მოტივზე.
ეს ყველაფერი კიდევ ერთხელ ადასტურებს რამდენად საშიშია ქართული ოცნების ხელისუფლება საქართველოს თითოეული მოქალაქისთვის, რადგან ის ემსახურება ოლიგარქის ოჯახის პირად ინტერესებს და მზადაა შურისძიების იარაღად იქცეს სწორედ ამ ოჯახის წევრთა ხელში",- ნათქვამია განცახდებაში.
განცხადებას ხელს აწერენ:
- გირჩი-მეტი თავისუფლება
- ევროპული საქართველო
- მოძრაობა დროა
- ერთიანი ნაციონალური მოძრაობა
- ლეიბორისტული პარტია
- გამარჯვებული საქართველო
- ერთიანი საქართველო-დემოკრატიული მოძრაობა
- ახალი ქრისტიან დემოკრატები სამართლიანობისთვის
- ლელო საქართველოსთვის
- სტრატეგია აღმაშენებელი
- ქრისტიან დემოკრატიული მოძრაობა
- ევროპული დემოკრატები
- კანონი და სამართალი
- პროგრესი და თავისუფლება
- ქართული არჩევანი
- საქართველოს პარლამენტართა საზოგადოება
- ეროვნულ დემოკრატიული პარტია
- სახელმწიფო ხალხისათვის
- თავისუფალი საქართველო
- სამოქალაქო ალიანსი თავისუფლებისათვის
- ქრისტიან კონსერვატული პარტია
- ემსახურე საქართველოს
