დარწმუნებული ვარ, საპატრიარქოს არაფერი აქვს დასამალი - თალაკვაძე ნინოწმინდაზე

საქართველოს პარლამენტის ვიცესპიკერი ნინოწმინდის პანსიონთან დაკავშირებით განცხადებას აკეთებს. არჩილ თალაკვაძე დარწმუნებულია, რომ "საპატრიარქოს არაფერი აქვს დასამალი". თალაკვაძის თქმით, აქვს იმედი, რომ "საპატრიოარქოსთან კომუნიკაციით ამ საკითხზე შეთანხმება მოხდება" და სახალხო დამცველს მონიტორინგის საშუალება მიეცემა:

"ბავშვის უფლებების კონსტიტუციური დაცვის მექანიზმები, ბავშვზე ვრცელდება ყველგან, ნებისმიერ ადგილას, სადაც არ უნდა იყოს ის. საქართველოს მოქალაქე ყველა ბავშვი დაცულია ამ კონსტიტუციური მექანიზმებით. რაც შეეხება სახალხო დამცველს, მას აქვს უფლება რომ ჩაატაროს მონიტორინგი ნებისმიერ დახურულ დაწესებულებაში, სადაც განთავსებული არიან საქართველო მოქალაქეები და ბავშვები მათ შორის და მე დიდი იმედი მაქვს, რომ საპატრიარქოსთან კომუნიკაციით ამ საკითხის შეთანხმება მოხდება.

პარლამენტის ადამიანის უფლებათა კომიტეტი ჩაერთო ამ საკითხში და მე ვფიქრობ, რომ პარლამენტი ხელს შეუწყობს ყველანაირად, რომ ამ საერთო ჭეშმარიტებაზე, რასაც კანონი ითვალისწინებს შეთანხმება მოხდეს. მჯერა და დარწმუნებული ვარ, რომ საპატრიარქოს არაფერი აქვს დასამალი, მით უმეტეს მაშინ, როცა საკითხი ეხება ბავშვებზე მზრუნველობას", - ამბობს თალაკვაძე.

ცნობისთვის,  15 აპრილს სახალხო დამცველის აპარატის თანამშრომლები მონიტორინგის განსახორციელებლად, საქართველოს მართლმადიდებლური ეკლესიის საპატრიარქოს ა(ა)იპ ჯავახეთის ნინოწმინდის წმინდა ნინოს ობოლ, უპატრონო და მზრუნველობამოკლებულ ბავშვთა პანსიონში არ შეუშვეს.

ომბუდსმენის წარმომადგენლები ნინოწმინდის ბავშვთა სახლში არც გაეროს დროებითი ღონისძიების შემდეგ შეუშვეს. სამაგიეროდ, პანსიონში იმყოფებოდა პედოფილიაში ბრალდებული მეუფე სერაფიმე. 

ამავე თემაზე: 

• საპატრიარქოსა და სპირიდონის არ ხსენება ჩრდილს აყენებს თქვენს გამბედავ, სწორ და დროულ განცხადებას - ნიკა გვარამია ენმ-ს;
• ყოველ დღე უნდა იყოს აქცია ნინოწმინდაზე, დღეს 6-ზე პროკურატურასთან შევიკრიბოთ - ხოშტარია.
• სახელმწიფოს გულგრილობა ახალისებს კონკრეტულ ადამიანებს ძალადობისკენ - დეკანოიძე ნინოწმინდაზე 
• ნინოწმინდაში რაც ხდება მხოლოდ აისბერგის წვერია, კონკორდატი უნდა გაუქმდეს - ჯაფარიძე