გამოკითხულია რამდენიმე არასრულწლოვანი - შსს ნინოწმინდაში საგამოძიებო მოქმედებებზე
გამოქვეყნდა:
ნინოწმინდის პანსიონში ცოტა ხნის წინ შინაგან საქმეთა სამინისტრო შევიდა. უწყების განცხადებით, საგამოძიებო მოქმედებები უწყვეტ რეჟიმში მიმდინარეობს და რამდენიმე არასრულწლოვანი უკვე გამოკითხულია.
"უწყვეტ რეჟიმში მიმდინარეობს საგამოძიებო და საპროცესო მოქმედებები, მათ შორის საქმესთან შემხებლობაში მყოფი პირების გამოკითხვები. საპროცესო ღონისძიებებში არასრულწლოვანთა მონაწილეობა ხდება კანონმდებლობის სრული დაცვით და ბავშვის საუკეთესო ინტერესების გათვალისწინებით. გამოძიების პროცესში ჩართული არის შინაგან საქმეთა სამინისტროს ადამიანის უფლებათა დაცვისა და გამოძიების ხარისხის მონიტორინგის დეპარტამენტი და მოწმისა და დაზარალებულის კოორდინატორები. უკვე გამოკითხულია რამდენიმე არასრულწლოვანი", - წერია უწყების განცხადებაში.
უწყებამ მედიასაშუალებებს მოუწოდა ითანამშრომლონ გამოძიებასთან და გამოძიებისთვის საჭირო, საინტერესო ინფორმაცია მიაწოდონ.
სახელმწიფო ზრუნვისა და ტრეფიკინგის მსხვერპლთა, დაზარალებულთა დახმარების სააგენტომ დღეს გაავრცელა ინფორმაცია, რომ ნინოწმინდის პანსიონის დატოვების სურვილი 6-მა არასრულწლოვანმა გამოთქვა. მათივე ინფორმაციით, მუშაობა კიდევ 10-მდე ბავშვის გაყვანაზე მიმდინარეობს.
ამ დროისთვის ნინოწმინდის ბავშვთა პანსიონში სოციალური მუშაკები და სსიპ სამედიცინო საქმიანობის სახელმწიფო რეგულირების სააგენტოს წარმომადგენლები იმყოფებიან. ისინი ტერიტორიაზე დილით შეუშვეს, უწყების წარმომადგენლებმა განაცხადეს, რომ სალიცენზიო პირობებს სწავლობენ.
ამავე თემაზე:
