მთავრობამ ლატვიას 50 000 დოზა ვაქცინის ჩუქებაზე უარი უთხრა - გიორგი კანდელაკი
გამოქვეყნდა:
საქართველოს მთავრობამ ლატვიას 50 000 დოზა "ასტრაზენეკას" ვაქცინის ჩუქებაზე უარი უთხრა - ამის შესახებ ინფორმაციას "ევროპული საქართველოს" წევრის, გიორგი კანდელაკი ავრცელებს. მისი თქმით, ეს იმ ფონზე მოხდა, როცა 5 ივლისის მოვლენების შემდეგ ბალტიის ქვეყნებმა ღარიბაშვილს ვიზიტზე უარი უთხრეს.
"ჩენთვის ცნობილი გახდა, რომ სწორედ მაშინ, როცა პრემიერმინისტრ ღარიბაშვილს უარი ეთქვა ბალტიის ქვეყნებში ვიზიტზე, სწორედ 5 ივლისის მოვლენების ფონზე და იმის ფონზე, რომ მთავრობა ღია ალიანსში შევიდა რუსეთთან დაკავშირებულ ექსტრემისტებთან, რომლებმაც 5 ივლისს მოაწყვეს მასობრივი, ორგანიზებული ძალადობა, სწორედ ამ პერიოდში საქართველოს მთავრობამ უარი უთხრა ლატვიას რამდენიმე ათეული ათასი ხარისხიანი ვაქცინის ჩუქებაზე, კერძოდ, საუბარია 50 000 დოზა ასტრაზენეკაზე",- თქვა კანდელაკმა.
კანდელაკის თქმით, გაუგებარია რატომ არ შეიძლებოდა ვაქცინების ეს დოზები მასწავლებლების ასაცრელად გამოეყენებინათ იმისთვის, რომ 15 სექტემბერს სწავლა საკლასო ოთახებში განახლებულიყო.
მისი შეფასებით, ვაქცინის ჩუქებაზე უარი უპასუხისმგებლო საქციელია.
