სიტუაციის დამძიმების შემთხვევაში, პასუხისმგებლობა სრულად ეკისრება ხელისუფლებას - "ლელო" მიხეილ სააკაშვილზე

პარტია "ლელო" მიხეილ სააკაშვილის ჯანმრთელობის მდგომარეობასთან დაკავშირებით გავრცელებულ ინფორმაციას განცხადებით ეხმაურება და წერს, რომ სიტუაციის დამძიმების შემთხვევაში პასუხისმგებლობა ხელისუფლებას ეკისრება.

"მიხეილ სააკაშვილის საქართველოში დაბრუნების დროსა და ფორმაზე შესაძლოა განსხვავებული მოსაზრებები არსებობდეს, მაგრამ დღეს პრეზიდენტის ციხეში ყოფნა ურთულეს პოლიტიკურ რეალობას ქმნის.

სიტუაციას ამძიმებს საქართველოში არსებული პოლიტიზებული მართლმსაჯულების სისტემა და ყოფილი პრეზიდენტის მიმართ ქვეყნის პრემიერ-მინისტრის მიერ გაკეთებული განცხადებები, რომელიც პოლიტიკური დევნის და ანგარიშსწორების პირდაპირი დადასტურებაა.

ხელისუფლების წარმომადგენელთა ქცევა და მათ მიერ გამოთქმული პატიმრის ღირსების შემლახავი შეფასებები სრულად გაცდენილია პოლიტიკური პასუხისმგებლობისა და მორალის ჩარჩოებს.

მიხეილ სააკაშვილის მიერ ციხეში გამოცხადებული შიმშილობა კიდევ უფრო ამძიმებს შექმნილ ვითარებას. შიმშილობის ყოველი მომდევნო დღე შესაძლოა დრამატულად სახიფათო აღმოჩნდეს პატიმრობაში მყოფი პრეზიდენტის ჯანმრთელობისთვის.

ვაფრთხილებთ ხელისუფლებას - სიტუაციის დამძიმების შემთხვევაში პასუხისმგებლობა სრულად ეკისრება მათ. აქ მხოლოდ ერთი ადამიანის ჯანმრთელობის მდგომარეობის პრობლემა არ დგას.

საქართველოს უახლეს ისტორიაში არ შეიძლება დავუშვათ მეორე ტრაგიკული ბედის პრეზიდენტის ისტორიის შექმნა. ასეთი დამღით ქართული საზოგადოება ვეღარასოდეს შეძლებს სამოქალაქო ერთობას და ნორმალური სახელმწიფოს ჩამოყალიბებას",-წერია განცხადებაში.

დღეს, 10 ოქტომბერს მიხეილ სააკაშვილის პირადმა ექიმმა თქვა, რომ მისი ჯანმრთელობის მდგომარეობა დამძიმდა.

მესამე პრეზიდენტი ქვეყანაში 1 ოქტომბერს ჩამოვიდა. ინფორმაცია ამის შესახებ თავად მიხეილ სააკაშვილმა 
Facebook-ზე გაავრცელა. მმართველი გუნდი მთელი დღის განმავლობაში ამტკიცებდა, რომ მესამე პრეზიდენტს უკრაინის საზღვარი არ გადმოუკვეთავს და ის საქართველოში არ იმყოფებოდა, თუმცა დღის ბოლოს ის პრემიერმმინისტრმა თქვა, რომ ის საქართველოში დააკავეს. უკვე მე-10 დღეა, რაც მიხეილ სააკაშვილი საპატიმროში შიმშილობს.