იზა ჩირგაძის საკონტაქტო ნომერი დილიდან გამორთულია და მასთან დაკავშირება ვერ ხერხდება | ISFED-ის განცხადება 

"სამართლიანი არჩევნები" მოუწოდებს სამართალდამცავ ორგანოებს დროულად გამოიძიონ საუბნო საარჩევნო კომისიის წევრის მიერ გაჟღერებული დანაშაულის ნიშნების შემცველი ფაქტები და მიიღონ სათანადო და დროული ზომები იზა ჩირგაძეზე სავარაუდო ზეწოლის აღსაკვეთად. 

არასამთავრობო ორგანიზაციაში აცხადებენ, რომ მზად არიან, სამართლებრივად დაიცვან იზა ჩირგაძის უფლებები, თუმცა მათი თქმით, ჩირგაძესთან დაკავშირებას დილიდან ვერ ახერხებენ.

"1 ნოემბერს , საღამოს „სამართლიან არჩევნებს“ იზა ჩირგაძისათვის სამართლებრივი დახმარების გაწევის თხოვნით მომართა „გირჩი - მეტი თავისუფლების“ წევრმა, ერთიანი ოპოზიციის ქუთაისის ვიცე-მერობის კანდიდატმა, იმედა კლდიაშვილმა. ორგანიზაციის წარმომადგენელი მაშინვე დაუკავშირდა ჩირგაძეს და 2 ნოემბერს 13:30 საათზე სამართლებრივი დახმარების საჭიროების ფარგლებისა და ინფორმაციის დაზუსტების მიზნით შეუთანხმდა შეხვედრაზე, თუმცა, დღეს, დილიდან იზა ჩირგაძის საკონტაქტო ტელეფონის ნომერი გამორთულია და მასთან დაკავშირება ამ დრომდე ვერ ხერხდება.

1 ნოემბერს, ღამის საათებში იმედა კლდიაშვილმა განაცხადა, რომ იზა ჩირგაძეზე სუს-ის მიერ განხორციელდა ზეწოლა, მას აუკრძალეს კავშირი ოპოზიციის წარმომადგენლებთან.  კლდიაშვილმა, პროტესტის ნიშნად, ავტომობილით ქუთაისში სახელმწიფო უსაფრთხოების სამსახურის შესასვლელი გადაკეტა. სამართალდამცავებმა იგი დაუმორჩილებლობის გამო ძალის გამოყენებით, ადმინისტრაციული წესით დააკავეს. 

“სამართლიანი არჩევნები” მიიჩნევს, რომ ჩირგაძისა და მისი ოჯახის უსაფრთხოებაზე და ზეწოლისგან თავისუფალი გარემოს უზრუნველყოფაზე სრული პასუხისმგებლობა ეკისრებათ სამართალდამცავ ორგანოებს. ამასთან, ორგანიზაცია მოუწოდებს შესაბამის უწყებებს დროულად გამოიძიონ საუბნო საარჩევნო კომისიის წევრის მიერ გაჟღერებული დანაშაულის ნიშნების შემცველი ფაქტები და მიიღონ სათანადო და დროული ზომები იზა ჩირგაძეზე სავარაუდო ზეწოლის აღსაკვეთად",- ნათქვამია განცხადებაში. 

შეგახსენებთ, რომ 1 ნოემბერს, ქუთაისის  90-ე საუბნო საარჩევნო კომისიის წევრმა, იზა ჩირგაძემ, რომელიც პროფესიული ნიშნით არჩეული იყო საოლქო საარჩევნო კომისიის მიერ, განაცხადა, რომ კენჭისყრის დღეს, 90-ე საარჩევნო უბანზე ის კომისიის რეგისტრატორი წევრი იყო, რა დროსაც შენიშნა სხვისი პირადობის მოწმობით მისული ამომრჩევლები, რომლებსაც ბიულეტენები არ გადასცა, რითაც აღკვეთა მათი არჩევნებში უკანონოდ მონაწილეობა.  მისი თქმით, ამის შემდეგ მას მმართველი პარტიის წარმომადგენელი უკავშირდებოდა და იმ მოქალაქეებისთვის, რომლებიც არ იყვნენ 90-ე უბნის ამომრჩევლები, ბიულეტენების გადაცემას სთხოვდა.

იხილეთ ასევე:

• "კატეგორიულად მოვითხოვ იმედა კლდიაშვილის გათავისუფლებას" | ხატია დეკანოიძის საგანგებო ბრიფინგი
• "მე რა შუაში ვარ"? - ქუთაისის 90-ე საუბნო კომისიის თავმჯდომარე სკანდალურ ბრალდებაზე
• "ეცნენ, გამოგლეჯვა უნდოდათ..." - გატაცების მცდელობა და ტერორი "ოცნების" კოორდინატორზე, რომელმაც გაყალბების სქემა ამხილა 
• "ოცნების" წარმომადგენელი ინგა არჩევნების გაყალბებას მაძალებდა - კომისიის წევრი ალაპარაკდა