"სასამართლოს გადაწყვეტილებას გავასაჩივრებთ" | პროკურატურის განცხადება ხაზარაძე-ჯაფარიძე-წერეთლის საქმეზე
გამოქვეყნდა:
პროკურატურა ხაზარაძე-ჯაფარიძე-წერეთლის საქმეზე თბილისის საქალაქო სასამართლოს მიერ მიღებულ გადაწყვეტილებასთან დაკავშირებით განცხადებას ავრცელებს.
უწყების განცხადების თანახმად, მოსამართლემ ბრალდების მხარის მტკიცებულებები "სრულად გაიზიარა", თუმცა დანაშაულის სამართლებრივ კვალიფიკაციას არ დაეთანხმა და ამის გამო, ბრალდებულთა ქმედება თაღლითობის მუხლით დააკვალიფიცირა.
პროკურატურა მოსამართლე გიორგი არევაძის დღევანდელ გადაწყვეტილებას სააპელაციო სასამართლოში გაასაჩივრებს.
"თბილისის საქალაქო სასამართლომ სრულად გაიზიარა ბრალდების მხარის მიერ წარდგენილი მტკიცებულებები და სს ,,თიბისი ბანკი“-ს კუთვნილი 16 664 000 აშშ დოლარის თაღლითურად დაუფლების ფაქტზე მამუკა ხაზარაძე, ბადრი ჯაფარიძე და ავთანდილ წერეთელი საქართველოს სისხლის სამართლის კოდექსის 180-ე მუხლით დამნაშავედ ცნო და გამამტყუნებელი განაჩენი გამოიტანა. ამასთან, სასამართლო არ დაეთანხმა ბრალდების მხარის შეფასებას ჩადენილი დანაშაულის სამართლებრივ კვალიფიკაციაში, რის გამოც ბრალდებულთა ქმედება დაკვალიფიცირდა თაღლითობის მუხლით.
აღნიშნულ სისიხლის სამართლის საქმეზე, თითოეულ მსჯავრდებულს სასჯელის სახედ და ზომად განესაზღვრა თავისუფლების აღკვეთა 7 წლის ვადით. საქართველოს სისხლის სამართლის საპროცესო კანონმდებლობის საფუძველზე, თაღლითობის დანაშაულზე სისხლისსამართლებრივი დევნის ხანდაზმულობის ვადის გასვლის გამო, ისინი გათავისუფლდნენ სასჯელის მოხდისგან.
საზოგადოებას შევახსენებთ, რომ მამუკა ხაზარაძეს, ბადრი ჯაფარიძეს და ავთანდილ წერეთელს ბრალდება წარდგენილი ჰქონდათ უკანონო შემოსავლის ლეგალიზაციის ფაქტზე, საქართველოს სისხლის სამართლის კოდექსის 194-ე მუხლით.
ბრალდების მხარე, სასამართლოს დღევანდელ გადაწყვეტილებას კანონით დადგენილ ვადაში სააპელაციო სასამართლოში გაასაჩივრებს", - ნათქვამია განცხადებაში.
ამავე თემაზე:
- სასამართლომ ხაზარაძე, ჯაფარიძე და წერეთელი დამნაშავედ ცნო - დანაშაულის ხანდაზმულობის გამო, მათ არ დააპატიმრებენ
- "ეს ბრძოლა გაგრძელდება!" - მამუკა ხაზარაძე და ბადრი ჯაფარიძე სასამართლოს გადაწყვეტილებას გაასაჩივრებენ
- "გასაჩივრდება ყველა ვარიანტში, რაც არ უნდა მოხდეს" - ავთანდილ წერეთელი განაჩენზე
- "პროკურატურას თავზე ჩამოემხო ფულის გათეთრების საქმე! ბოლომდე ვიბრძოლებთ" - ვატო წერეთელი
