ესტონეთის ყოფილი პრეზიდენტი, თომას ჰენდრიკ ილვესი ამბობს, რომ საქართველო რუსეთის თანამონაწილედ იქცა იმით, რომ არანაირ სოლიდარობას არ გამოხატავს უკრაინის მიმართ. ამ თემაზე მან "რადიო თავისუფლებასთან" ინტერვიუში ისაუბრა და მთავრობის პოზიცია აბსოლუტურად გულისამრევად შეაფასა.
"როგორ შეიძლება, საქართველო, ქვეყანა, სადაც მე შუა ომის დროს ჩავფრინდი, დღეს უკრაინას მხარს არ უჭერდეს? სანქციებს არ შეუერთდით - და საქართველო რაიმე სოლიდარობას ელის? მართლაც ელით, რომ [ამის შემდეგ] სერიოზულად განგიხილავენ ნატოს და ევროკავშირის წევრად? საქართველომ აჩვენა, როგორი ქვეყანა იქნებოდა, ევროკავშირის ან ნატოს წევრი რომ ყოფილიყო. ეს ვნახეთ. ვინ დაუჭერს მხარს საქართველოს, რომელიც მხარს არ უჭერს დასავლეთის ამჟამინდელ სუსტ პოზიციასაც?" - ამბობს ილვესი.
მისი განცხადებით, არავინ დაუჭერს მხარს საქართველოს ევროკავშირსა და ნატოში გაწევრიანებას, თუ გავითვალისწინებთ მთავრობის პასუხს იმაზე, რაც ხდება უკრაინაში.
ილვესმა ჟურნალისტის კითხვას - რა არის საქართველოს მთავრობის მოტივაცია? ამ პოზიციის მიღმა? უპასუხა:
"წარმოდგენა არ მაქვს, რა არის საქართველოს მთავრობის მოტივაცია, და თანაც, ჩვენ გადაწყვეტილებებს მოტივაციებზე დაყრდნობით არ მივიღებთ - მივიღებთ იმის მიხედვით, როგორც იქცევით, და ასე თუ მოიქცევით, უნდა გაიაზროთ, რომ გამორიცხულია, იმ ქვეყნებმაც კი თითი გაანძრიონ თქვენს [დასაცავად], რომლებიც აქამდე მხარს გიჭერდნენ. ვინ ენდობა საქართველოს, რომ ნატოს მეხუთე მუხლს დაიცავს, თუ თავად მას არ დაესხმიან თავს? რა მოხდება, თუ საქართველოს მივიღებთ ნატოში, მერე რომელიმე სხვა ქვეყანა აგრესიის მსხვერპლი გახდება, და საქართველო იტყვის - არა, უკაცრავად, მეხუთე მუხლს მხარს ვერ დავუჭერთ? როგორც იქცევით, დასკვნებსაც იმის მიხედვით გავაკეთებთ",- ამბობს ის.
იხილეთ ასევე:
