რუსეთის საგარეო საქმეთა სამინისტროს ინფორმაციით, ანტირუსული სანქციების საპასუხოდ, სანქციები უწესდებათ აშშ-სა და კანადის მოქალაქეებს.
მათ შორის არიან მაღალჩინოსნები, ბიზნესმენები, ექსპერტები და ის პირები, ვინც "რუსოფობიურ დღის წესრიგს ქმნიან“.
ე.წ. შავ სიაში მოხვდნენ META-ს დამფუძნებელი მარკ ცუკერბერგი და აშშ-ის ვიცე-პრეზიდენტი, კამალა ჰარისი. მათ რუსეთში შესვლა ეკრძალებათ განუსაზღვრელი ვადით.
რუსეთი სულ აშშ-ს 29 მოქალაქეს უწესებს სანქციებს.
სანქცირებულთა სიაში მოხვდნენ: აშშ-ის სახელმწიფო დეპარტამენტის სპიკერი ედვარდ პრაისი, თავდაცვის მინისტრის მოადგილე კეტლინ ჰიქსი, პენტაგონის სპიკერი ჯონ კირბი, LinkedIn-ის აღმასრულებელი დირექტორი რაიან როსლანსკი და სხვები.
სანქციები წესდება კანადის 61 მოქალაქის წინააღმდეგაც. მათ შორის არიან მაღალი თანამდებობის პირები, ყოფილი და მოქმედი სამხედრო მაღალჩინოსნები, ექსპერტები და წამყვანი მედიების წარმომადგენლები.
