"მთავარი არხის" გენერალური დირექტორის უფლებადამცველი, დიმიტრი საძაგლიშვილი ამბობს, რომ ნიკა გვარამიას ციხის საკანში ამ დრომდე არ აქვს ტელევიზორი, ამიტომ ვიზიტორები მას აწვდიან ინფორმაციას რა ხდება ქვეყნის შიგნით და გარეთ მის პოლიტიკურ პატიმრობასთან დაკავშირებით.
"ვინაიდან მას ჯერ არ აქვს ტელევიზორი, ის სრულიად მოწყვეტილია გარესამყაროს და ჩვენი საუბრის დიდი ნაწილი ეთმობა ინფორმაციის მიწოდებას - რა ხდება, როგორია საერთაშორისო გამოხმაურება, როგორია ქვეყნის შიგნით არსებული გამოხმაურება მის ცალსახად პოლიტიკურ განაჩენთან დაკავშირებით.
კიდევ ერთხელ ხაზი უნდა გავუსვათ გარემოებას, რომ ამ საქმეში არ მგონია, არსებობდეს ადამიანი, რომელიც დარწმუნებული არ იქნება, რომ მხოლოდ პოლიტიკური მოტივით მოხდა ნიკა გვარამიას დაპატიმრება. ყველა ის სუბიექტი, რომელსაც წვდომა ჰქონდა საქმის მასალებზე, ყველა ვინც მონიტორინგს აწარმოებდა განხილვისას ადასტურებდა, რომ არათუ მტკიცებულებები არ იყო საქმეში, არამედ თავად ეს საქმე, პროკურატურის ვერსიაც კი არ წარმოადგენდა დანაშაულს. ლაშა ჩხიკვაძემ შეასრულა პოლიტიკური დაკვეთა და გააჟღერა ბიძინა ივანიშვილის მიერ მიღებული გადაწყვეტილება.
ეს გადაწყვეტილება გარდა იმისა, რომ შინაარსობრივად არის პრობლემური, იმიტომ, რომ დემოკრატიულ საზოგადოებაში არ შეიძლება კრიტიკული მედიის ხელმძღვანელი იყოს ასეთი ყალბი ბრალდებებით დაპატიმრებული, მეორე მხრივ იმის გათვალისწინებით, თუ როდის გამოაცხადა სასამართლომ ეს განაჩენი, მიუთითებს საბოტაჟზე ევროკავშირთან ინტეგრაციის თვალსაზრისით. ეს არის ხელისუფლების ღიად დეკლარირებული გადაწყვეტილება, რომ ისინი არიან პუტინთან ერთად ერთ ნავში. ღრმად ვარ დარწმუნებული, რომ მათ არ გამოუვათ საქართველოს რუსეთის გუბერნიად ქცევა",- ამბობს დიმიტრი საძაგლიშვილი.
ცნობისთვის, 16 მაისს, მოსამართლე ლაშა ჩხიკვაძემ "მთავარი არხის" გენერალურ დირექტორს, ნიკა გვარამიას 3 წლითა და 6 თვით პატიმრობა მიუსაჯა. ნიკა გვარამია სასამართლო დარბაზშივე დააკავეს. "რუსთავი 2-ის" საქმეზე ბრალდებული ზურაბ იაშვილი მოსამართლემ გაამართლა, კახა დამენიას კი 50 000 ლარიანი ჯარიმა დაეკისრა უფლებამოსილების ბოროტად გამოყენებისთვის.
