ევროპარლამენტარი მიხაილ გალერი ირაკლი ღარიბაშვილის ბრალდებებს გამოეხმაურა. გალერი წერს, რომ ქართველმა ხალხმა უკეთ იცის, ვინ უნდა დაადანაშაულოს იმაში, რომ ევროკომისიამ საქართველოსთვის სტატუსის მინიჭებაზე რეკომენდაცია არ გასცა.
ღარიბაშვილმა პარლამენტში სიტყვით გამოსვლისას თქვა, რომ ოპოზიციონერები, ევროპის სახალხო პარტია და უკრაინის ხელისუფლება "დაჟინებით ითხოვდნენ", საქართველოსთვის არ მიენიჭებინათ კანდიდატის სტატუსი.
"დარწმუნებული ვარ ქართველმა ხალხმა, რომელიც საქართველოს ევროპული მომავლის დემონსტრირებას ახდენს, უკეთ იცის, ვინ დაადანაშაულოს იმ ფორმულირებისთვის, რომლის გამოყენებაც ევროკომისიას მოუწია, რათა შესაბამისად და სამართლიანად გამოხმაურებოდა საქართველოს მთავრობის პრობლემებს", - დაწერა მან.
- დავით არახამია დაჟინებით ითხოვდა არ მიეღო საქართველოს კანდიდატის სტატუსი - ღარიბაშვილი
- ოპოზიციას, EPP-ს, უკრაინის ხელისუფლებას პირდაპირ ვადებ ხელს, ითხოვდნენ, არ მოეცათ სტატუსი - ღარიბაშვილი
17 ივნისს, ევროკომისიამ უკრაინისა და მოლდოვასთვის სტატუსის მინიჭებაზე რეკომენდაცია გასცა. საქართველოსთვის კი წინასწარი პირობები მოითხოვა. სამი ქვეყნისთვის კანდიდატის სტატუსის მინიჭებაზე ევროპული საბჭო 24 ივნისს იმსჯელებს და საბოლოო გადაწყვეტილებას მიიღებს.
