პუტინმა საკუთარ მთავრობაში საკადრო ცვლილებები განახორციელა - რუსეთის პრეზიდენტმა ხელი მოაწერა განკარგულებას მრეწველობისა და ვაჭრობის მინისტრის დენის მანტუროვის ვიცე-პრემიერად დანიშვნის შესახებ. დოკუმენტი კრემლის ვებგვერდზე გამოქვეყნდა.
მანამდე მანტუროვის კანდიდატურა სახელმწიფო დუმამ დაამტკიცა.
„რუსეთის ფედერაციის კონსტიტუციის 83-ე მუხლის „ე“ პუნქტის შესაბამისად, დენის ვალენტინოვიჩ მანტუროვი დანიშნეთ რუსეთის ფედერაციის მთავრობის თავმჯდომარის მოადგილედ - რუსეთის ფედერაციის მრეწველობისა და ვაჭრობის მინისტრად“, - ნათქვამია განკარგულებაში.
ამავდროულად, სახელმწიფოს მეთაურმა თანამდებობიდან გაათავისუფლა ვიცე-პრემიერი იური ბორისოვი და ის დიმიტრი როგოზინის ნაცვლად როსკოსმოსის გენერალურ დირექტორად დანიშნა.
კიდევ ერთი განკარგულებით პუტინმა მთავრობის სტრუქტურაში ცვლილებები შეიტანა. რამდენიმე დღის წინ პრეზიდენტმა მათი რიცხვი 10-დან 11-მდე გაზარდა ვიცე-პრემიერის - მრეწველობისა და ვაჭრობის მინისტრის პოსტის შემოღებით.
ვიცე-პრემიერებად რჩებიან: იური ტრუტნევი, ტატიანა გოლიკოვა, ანდრეი ბელუსოვი, დიმიტრი ჩერნიშენკო, მარატ ხუსნულინი, ვიქტორია აბრამჩენკო, ალექსეი ოვერჩუკი, დიმიტრი გრიგორენკო და ალექსანდრე ნოვაკი.
