ერთ-ერთი დაღუპული მორგშია გადასვენებული, მეორეს ცხედრის გამოსვენებას ვცდილობთ - უკრაინაში მებრძოლი ქართველი
გამოქვეყნდა:
რუს ოკუპანტებთან ბრძოლას უკრაინაში გუშინ კიდევ ორი ქართველი მებრძოლი ემსხვერპლა. იქ მყოფი ქართველი მებრძოლების თქმით, ერთ-ერთი მათგანის ცხედარი მორგშია, ხოლო მეორე მებრძოლის გამოსვენება ჯერ ვერ ხერხდება.
ბრძოლისას დაიჭრა კიდევ სამი ქართველი, მათი მდგომარეობა სტაბილურია.
"ბახმუტის მისადგომებთან, შეტაკებაში, ვაჟკაცურად, 30 მეტრში რუსებთან დაეტაკა 28-ე ბრიგადაში გაფორმებული ქართველი პარტიზანები. დაჭრილების მდგომარეობა ჯერჯერობით სტაბილურია, ნორმალურია, მათ სიცოცხლეს არაფერი არ ემუქრება. დაღუპული ერთ-ერთი გადაყვანილია კონსტანტინოვკის მორგში. ვაკო სულაძე თავის ბიჭებთან ერთად ყველაფერს ცდილობს, რომ მეორე მიცვალებულიც გამოიყვანონ", - თქვა უკრაინაში მებრძოლმა ქართველმა, დავით ქუქჩიშვილმა.
ცნობისთვის, ბახმუტთან იერიშის 3 დეკემბერს კიდევ 5 ქართველი გმირი ემსხვერპლა, რომელთა ცხედრების გამოსვენებაც ბრძოლის ველიდან ამ დრომდე ვერ ხერხდება.
