"მთავარი არხის" ეთერში გასულ ინფორმაციას, რომლის მიხედვითაც, გლდანის მე-8 სასჯელაღსრულების დაწესებულებაში ყოფილ პატიმარზე ფიზიკურად და ფსიქოლოგიურად იძალადეს, სპეციალურ პენიტენციურ სამსახურში ეხმაურებიან.
მათ მიერ გავრცელებულ განცხადებაში ნათქვამია, რომ ჩვენს მიერ გავრცელებული ინფორმაცია სიცრუე და პენიტენციური სისტემის დისკრედიტაციის მცდელობაა.
უწყების ამ განცხადებას უცვლელად გთავაზობთ:
სპეციალური პენიტენციური სამსახური ეხმაურება 2020 წლის 6 აგვისტოს ტელეკომპანია „მთავარის“ საინფორმაციო გამოშვებებში გასულ ყოფილი პატიმრის ანონიმურ ინტერვიუს, სადაც რესპოდენტი საუბრობს N8 პენიტენციურ დაწესებულებაში ყოფნის პერიოდზე და აცხადებს, რომ სხვა პატიმრების მხრიდან ადგილი ჰქონდა მასზე ფსიქოლოგიურ და ფიზიკურ ზეწოლას, ასევე სექსუალური შევიწროების მცდელობას. სპეციალური პენიტენციური სამსახური კატეგორიულად აცხადებს, რომ ეს არის სიცრუე და პენიტენციური სისტემის დისკრედიტაციის მცდელობა, ისევე როგორც ყოფილი პატიმრის ბრალდება, თითქოს ეს ყველაფერი წახალისებული იყო პენიტენციური დაწესებულების ადმინისტრაციის მხრიდან და მუქარები ყოფილი პატიმრის მიმართ დღესაც გრძელდება.
ინფორმაციისთვის, ტელეკომპანიის რესპოდენტი, რომელიც სავარაუდოდ უნდა იყოს ყოფილი ბრალდებული ლ.ტ., საქართველოს სისხლის სამართლის კოდექსის 180-ე მუხლის მეორე ნაწილით გათვალისწინებული დანაშაულის ჩადენის ბრალდებით 2020 წლის 14 თებერვალს მოთავსდა N8 პენიტენციურ დაწესებულებაში. მიმდინარე წლის 14 ივლისს თბილისის საქალაქო სასამართლოს გადაწყვეტილებით სასჯელის სახით მას დაეკისრა ჯარიმა 5000 ლარის ოდენობით, რის შემდეგაც ლ.ტ.-მ დატოვა საპატიმრო. ვინაიდან N8 პენიტენციური დაწესებულება არის დახურული ტიპის, დაწესებულებაში ყოფნის პერიოდში ბრალდებულს შეხება ჰქონდა მხოლოდ მის თანამესაკნეებთან და არ ჰქონია კონფლიქტი არც თანამესაკნეებთან და არც დაწესებულების თანამშრომლებთან. შესაბამისად, მისი განცხადებები იმასთან დაკავშირებით, თითქოს მის მიმართ განხორციელებული იყო ფსიქოლოგიური ან ფიზიკური ზეწოლა, არის სრული სიცრუე" - ნათქვამია განცხადებაში.
შეგახსენებთ, რომ "მთავარ არხთან" საუბრისას ყოფილი მსჯავრდებული ამტკიცებს, რომ გლდანის მე-8 სასჯელაღსრულების დაწესებულებაში მასზე ფიზიკურად და ფსიქოლოგიურად იძალადეს. ყვება, რომ სხვა პატიმრების მხრიდან გაუპატიურების მცდელობაც იყო, რასაც ციხის ადმინისტრაცია ხელს უწყობდა.
მისი თქმით, სიცოცხლის მოსპობით სასჯელაღსრულების დაწესებულებიდან დღემდე ემუქრებიან, ამიტომ ვინაობის გამხელა არ სურს. მან უკვე მიმართა სახელმწიფო ინსპექტორის სამსახურს და ლონდა თოლორაიას უწყებამ საქმის შესწავლა დაიწყო.
