გლოვის ნიშნად საქართველოში ევროკავშირის წარმომადგენლობამ დროშა დაუშვა
გამოქვეყნდა:
საქართველოში გამოცხადებული გლოვის ნიშნად ევროკავშირის წარმომადგენლობამ დროშა დაუშვა. ამის შესახებ განცადება ევროკავშირის წარმომადგენლობამ Facebook-ზე გაავრცელა.
ევროკავშირის დროშა დაშვებულია რადგან კვირას, შატილის გზაზე ტრაგიკულად დაღუპულებს ვგლოვობთ. ვუსამძიმრებთ მათ ოჯახებსა და მეგობრებს და სწრაფ გამოჯანმრთელებას ვუსურვებთ დაზარალებულებს, - წერს ევროკავშირის ელჩი, კარლ ჰარცელი.
შეგახსენებთ, რომ 23 აგვისტოს ჟინვალი-ბარისახო-შატილის საავტომობილო გზის 64-ე კილომეტრზე სამგზავრო მიკროავტობუსი, დაახლოებით, 80 მეტრის სიმაღლიდან კლდოვან ფერდობზე გადავარდა. მომხდარის შედეგად, 17 ადამიანი გარდაიცვალა. მძიმედ დაშავდა 3 მოქალაქე, რომლებიც პირველ საუნივერსიტეტო კლინიკაში გადაიყვანეს, ორი მათგანი რეანიმაციაშია მოთავსებული.
შინაგან საქმეთა სამინისტრომ მომხდარ ფაქტზე გამოძიება საქართველოს სსკ-ის 276-ე მუხლით დაიწყო.
ტრაგედიის გამო 25 აგვისტო საქართველოში გლოვის დღეა.
