საქართველოს მესამე პრეზიდენტის, მიხეილ სააკაშვილის განცხადებას, რომელშიც ის საქართველოში დაბრუნებას აანონსებს, "ევროპული საქართველოს" ერთ-ერთი ლიდერი, გიგა ბოკერია ეხმაურება.
ამბობს, რომ დროა, ქვეყანაში ერთიდაიგივე სცენარი დასრულდეს და საქართველოში საერთოდ დევნილი პოლიტიკოსები არ არსებობდნენ.
საქართველოს ამოცანაა, რომ ეს ერთიდაიგივე სცენარი დასრულდეს. საქართველოში საერთოდ დევნილი პოლიტიკოსები არ არსებობდნენ და ეს ამბავი, რომ ერთი იძახის დავბრუნდების და მეორე მხარე იძახის, რომ ვერ დაბრუნდება და დევნას აგრძელებენ, დასრულდეს. ჩვენ გვჭირდება ქვეყნის ამ ჩიხიდან გამოყვანა, ჩვენ გვჭირდება გადასახადების შემცირება და მეტი ფული რომ დარჩეს ხალხს, ვინც შრომობს, - ამბობს გიგა ბოკერია.
შეგახსენებთ, რომ მიხეილ სააკაშვილმა სამშობლოში დაბრუნება დღეს, 27 აგვისტოს, სოციალურ ქსელში დააანონსა.
"ქართული ოცნება" საქართველოს მესამე პრეზიდენტის განცხადებას საქართველოში დაბრუნების შესახებ Facebook-ის გვერდზე ირონიულად გამოეხმაურა წარწერით "Miha Hamodii".
მოგვიანებით, მიხეილ სააკაშვილთან დაკავშირებით "ქართული ოცნების" პოსტს Facebook-ზე "ევროპული საქართველოც" გამოეხმაურა. პარტია წერს, რომ თუ ამომრჩეველს წრეზე ტრიალი მობეზრდა, გამოსავალი ევროპული კოალიციაა.
სააკაშვილმა კი საქართველო 2013 წელს, საპრეზიდენტო ვადის ამოწურვის შემდეგ დატოვა.
პროკურატურამ მიხეილ სააკაშვილს ბრალი წარუდგინა 2007 წლის 7 ნოემბრისა და ტელეკომპანია "იმედის" დარბევის საქმეზე, დეპუტატ ვალერი გელაშვილის ცემის საქმეზე. პრეზიდენტ სააკაშვილს უკავშირდება ე.წ. "პიჯაკების საქმეც" - პროკურატურა მესამე პრეზიდენტსა და სახელმწიფო დაცვის სპეციალური სამსახურის ყოფილ უფროსს, თეიმურაზ ჯანაშიას საბიუჯეტო სახსრების, კერძოდ კი 9 მილიონი ლარის გაფლანგვას ედავება. სააკაშვილს ბრალი წარუდგინეს სანდრო გირგვლიანის გარდაცვალების საქმეზეც.
მაშინ, ქვეყნის მესამე პრეზიდენტის თანაგუნდელები, მიხეილ სააკაშვილის წინააღმდეგ არსებულ "უსამართლო პოლიტიკურ დევნაზე" საუბრობდნენ.
ამ დროისთვის, მიხეილ სააკაშვილს პატიმრობა მისჯილი აქვს:
- სანდრო გირგვლიანის საქმეზე - თავისუფლების სამი წლით აღკვეთა;
- ვალერი გელაშვილის ცემის ფაქტზე - ექვსწლიანი პატიმრობა.
მიმდინარე საქმეები:
- 7 ნოემბრის საქმე;
- ე.წ პიჯაკების საქმე.
მიხეილ სააკაშვილი 7 მაისიდან უკრაინის რეფორმების ეროვნული საბჭოს აღმასრულებელი კომიტეტის თავმჯდომარეა.
