დიდი ბრიტანეთის პრემიერმინისტრი ნავალნის წინააღმდეგ ქიმიური იარაღის გამოყენების ფაქტს Twitter-ის ოფიციალურ გვერდზე ეხმაურება და რუსეთის მთავრობისგან ახსნა-განმარტებას მოითხოვს.
შემაშფოთებელია ის ფაქტი,რომ ნავალნის წინააღმდეგ ქიმიური იარაღი გამოიყენეს. ნოვიჩოკის მომაკვდინებელი შედეგები ჩვენ დიდ ბრიტანეთში უკვე ვნახეთ. რუსეთის მთავრობამ ახლა უნდა განმარტოს, რა დაემართა ნავალნის, - წერს ბორის ჯონსონი.
შეგახსენებთ, გერმანიის მთავრობის ცნობით, რუსი ოპოზიციონერი პოლიტიკოსი, ალექსეი ნავალნი ნოვიჩოკის ნერვული აგენტით მოწამლეს. ნოვიჩოკით მოწამვლა ტოქსიკოლოგიურმა ტესტებმა დაამტკიცა და ამაში ეჭვი გერმანიას არ ეპარება.
გერმანიის კანცლერი ანგელა მერკელი უკვე ხვდება მინისტრებს, რათა განიხილონ ყველა ნაბიჯი, რომლის გადადგმასაც მოწამვლის დადასტურების შემთხვევაში გეგმავდნენ. 29 აგვისტოს გერმანიის საგარეო საქმეთა მინისტრმა, ჰაიკო მაასმა თქვა, რომ ბერლინი მზადაა, დიპლომატიური სანქციები დაუწესოს მოსკოვს, თუ დადგინდება, რომ ალექსეი ნავალნის მოწამლვაში რუსეთის სახელმწიფო ინსტიტუტები იყო ჩართული.
გერმანიის მთავრობის მიერ გავრცელებულ ინფორმაციას, რომლის მიხედვითაც ალექსეი ნავალნი ნოვიჩოკით მოწამლეს, რუსეთი საპასუხო ბრალდებებით პასუხობს - ლაბორატორიები რომელშიც ქიმიური ნივთიერება ნოვიჩოკი მზადდება, საქართველოსა და შეერთებულ შტატებში მდებარეობს - ამის შესახებ დუმის დეპუტატმა და თავდაცვის კომიტეტის ხელმძღვანელის მოადგილემ იური შვიტკინმა რუსულ მედიასთან ისაუბრა.
შეგახსენებთ, რომ რუსი ოპოზიციონერი და პუტინის კრიტიკოსი, ალექსეი ნავალნი საავადმყოფოში უგონო მდგომარეობაში მყოფი 20 აგვისტოს მოათავსეს.
ნავალნის ოჯახის წევრები და მხარდამჭერები მისი ცუდად გახდომის დღიდან ამტკიცებდნენ, რომ ოპოზიციონერი პუტინის დაკვეთითაა მოწამლული. მეორე მხრივ, კრემლი ყოველთვის უარყოფდა ამ ბრალდებას.
ცნობისთვის, ნავალნი სამკურნალოდ გერმანიაში 22 აგვისტოს გადაიყვანეს, მას შემდეგ, რაც 21 აგვისტოს ევროკომისიამ განცხადება გაავრცელა და მოსკოვს ნავალნის გერმანიაში გაშვებისკენ მოუწოდა.
ნოვიჩოკის ნერვული აგენტით მოწამვლა პირველი შემთხვევა არაა. 2018 წლის მარტს, გაერთიანებული სამეფოს პრემიერმინისტრმა, ტერეზა მეიმ განაცხადა, რომ რუსეთის საგარეო დაზვერვის ყოფილი ჯაშუშის სერგეი სკრიპალის და მისი შვილის იულია სკრიპალის სოლსბერიში მოსაწამლად სწორედ ნოვიჩოკი გამოიყენეს.
