რა იცვლება სახელმწიფო მდივნის ვიზიტით - ანალიტიკოსების შეფასებები

არსებული პოლიტიკური კრიზისისა და ჩიხში შესული მოლაპარაკების ფონზე, რომელსაც ელჩი ფასილიტატორებიც ესწრებიან, საქართველოში აშშ-ის სახელმწიფო მდივანი მაიკ პომპეო ჩამოდის. 

რა კონკრეტული გზავნილები ექნება მას და რას შეცვლის მდივნის ვიზიტი - ანალიტიკოსები ფიქრობენ, რომ იმის მიუხედავად, რომ ჯერ ოფიციალურად არ არის შეხვედრა ოპოზიციასთან ჩანიშნული - საუბარი არჩევნებზე მაინც იქნება, როგორც სახელმწიფოს ოფიციოზთან ასევე არასამთავრობო სექტორთან. 

"მთავარი გზავნილი რაც უნდა იყოს - თუ არ იქნება სამართლიანობა, თუ არ იქნება სამართლიანი არჩევნების შედეგად არჩეული ხელისუფლება, არ იქნება მშვიდობა და სტაბილურობა" - ამბობს გიორგი რუხაძე. 

"პოლარიზებული საზოგადოების გამთლიანება ხდება მხოლოდ პოლიტიკური ძალების მხრიდან კონსესუსით - ისევ ამაზე იქნება აპელირება, ხელისუფლებისათვის იქნება მოწოდება, რომ ყველა კითხვაზე გაიცეს რაციონალური პასუხი და საუბარი იქნება კონსენსუსზე" - ამბობს სახელმწიფო მდივნის ვიზიტზე საუბრისას პოლიტოლოგი გია ხუხაშვილი. 

აქვე შეგახსენებთ, ოპოზიცია ცოცხალი ჯაჭვითა და აქცია პერფორმანსით გეგმავს დახვდეს მაიკ პომპეოს, რომელიც საქართველოს უკვე 2 დღეში ეწვევა.  ხელისუფლების ოპონენტები თავიანთ მხარდამჭერებთან ერთად ასე შეეცდებიან, ხმა მიაწვდინონ ამერიკის სახელმწიფო მდივანს გაყალბებულ არჩევნებზე. 

რას წერს დასავლური პრესა მაიკ პომპეოს ვიზიტზე და სავარაუდო გზავნილებზე, შეგიძლიათ, ნახოთ აქ.