ასეთი აქცია საქართველოში არასდროს ჩატარებულა– ოპოზიციის ლიდერები მდუმარე აქციაზე

საქართველოში ამერიკის სახელმწიფო მდივნის, მაიკ პომპეოს ვიზიტის პარალელურად ოპოზიცია და მხარდამჭერები მდუმარე აქციას მართავენ. ლიდერები, ამბობენ, რომ მსგავსი აქცია საქართველოში არასდროს არ ჩატარებულა და აქციები გაგრძელდება მანამ, სანამ არ ჩაინიშნება ახალი არჩევნები.

"პროტესტი გაგრძელდება სხვადასხვა ფორმით, სხვადასხვა სახით, მანამ სანამ თვალი თვალს არ გაუსწორდება, ერთი თვალი ოლიგარქის და საზოგადოების. სანამ არ ჩაინიშნება ახალი არჩევნები მსგავსი აქციები სხვადასხვა ფორმისა და ხასიათის გაგრძელდება, დღევანდელი აქციაც გულისხმობს იმას, რასაც ვაკეთებთ პირველი ნოემბრიდან, დღევანდელი აქცია განსაკუთრებით მნიშნველოვანია, რადგან უდიდესი ნაწილი საერთაშორისო მედიისა იმყოფება თბილისში და ეს აადვილებს ამ აქციების ცხოვრებას, იმ თვალსაზრისით, რომ საერთაშორისო დონეზე შენი ხმა უფრო მკაფიოდ ისმის" – თქვა ენმ–ს ლიდერმა, ნიკა მელიამ.

• ენმ–ს ლიდერის ხატია დეკანოიძის თქმით, დღევანდელი აქციის: "მთავარი მიზანი არის, ის რომ მთელმა საერთაშორისო თანამეგობრობამ გაიგოს, რომ პრორუსმა ოლიგარქმა, რომელმაც მიიტაცა სახელმწიფო, მიიტაცა ასევე არჩევნები და საქართველოს მოქალაქეებს წაართვა ნება, დააფიქსიროს საკუთარი არჩევანი".
• "სტრატეგია აღმაშენებელის" ლიდერი, გიორგი ვაშაძე ამბობს, რომ ამერიკა საქართველოს სტრატეგიული პარტნიორია და ქართველ ხალხს სურს ძლიერი ეკონომიკა და ამერიკის მხარდაჭერა ამაში ძალიან მნიშნველოვანია: "ულამაზესი აქციაა, ასეთი აქცია არ ყოფილა არასდროს საქართველოში", – ამბობს გიორგი ვაშაძე.
• აქციაზე არიან "ევროპული საქართველოს" ლიდერებიც, დავით ბაქრაძე ფიქრობს, რომ დღევანდელი აქცია პომპეოსთვის ყველაზე მნიშნელოვანი გზავნილია: "ასეთი აქცია, მართლაც არ ჩატარებულა საქართველოში არასდროს, ამ აქციას აქვს ორი მთავარი მესიჯი, პირველი ჩვენ ქართველი ხალხი მადლობელი ვართ აშშ–ის მხარდაჭერისთვის, მეორე საქართველო და ქართველი საზოგადოება არ შეეგუება არჩევნების გაყალბებას", – თქვა დავით ბაქრაძემ.
• "ეს არის გზავნილი თავისუფლების მოყვარე ქართველი საზოგადოების, რომ არ შევეგუებით გაყალბებულ არჩევნებს", – ამბობს დღევანდელ აქციაზე, "ევროპული საქართველო"ს ლიდერი, გიგი უგულავა.

ოპოზიციამ პომპეოს სპეციალური განცხადებითაც მიმართა, სადაც აღნიშნულია, რომ პოლიტიკური გარღვევისთვის ახლა საჭიროა უსაფრთხოების სფეროში დინამიკის ჩვენება, რაც აშშ-საქართველოს ორმხრივი თანამშრომლობის ახალ ეტაპზე გადაყვანას გულისხმობს.

ამ წუთებში თბილისის ცენტრალურ ქუჩაზე, ფილარმონიიდან – ოპერამდე მდუმარე აქცია იმართება, მთავარი გზავნილით, რომ არჩევნები გაყალბებულია.

შეგახსენებთ, მაიკ პომპეო საქართველოში თურქეთიდან 17 ნოემბერს ჩამოვიდა.