კიბერშეტევა ევროპის მედიკამენტების სააგენტოზე- სამიზნე სავარაუდოდ, COVID-19-ის ვაქცინებია
გამოქვეყნდა:
"ევროპის მედიკამენტების სააგენტოზე" (EMA) კიბერთავდასხმა განხორციელდა. ამის შესახებ ინფორმაციას BBC ავრცელებს.
სააგენტო ამჟამად COVID-19-ის ორი ვაქცინის შემოწმებაზე მუშაობს, რომლის დასრულებას სავარაუდოდ, რამდენიმე კვირაში აპირებს.
"EMA კიბერშეტევის ობიექტი გახდა. სააგენტომ სწრაფად დაიწყო გამოძიება სამართალდამცავებთან და სხვა შესაბამის პირებთან მჭიდრო თანამშრომლობით", - ნათქვამია სააგენტოს განცხადებაში.
გამოძიების დასრულებამდე, სააგენტო დამატებით დეტალებს არ ასაჯაროვებს.
შეგახსენებთ, რომ 14 ნოემბერს Microsoft-ის უსაფრთხოების სამსახურმა გაავრცელა ინფორმაცია იმის შესახებ, რომ რუსი და ჩრდილოეთ კორეელი ჰაკერები COVID-19 ვაქცინის მკვლევრებზე ჰაკერულ თავდასხმას ახორციელებდნენ.
ამასთან, რამდენიმე დღის წინ განცხადება გაავრცელა ინტერპოლმაც და მსოფლიოს ქვეყნების სამართალდამცავი ორგანოები გააფრთხილა, რომ ორგანიზებული დანაშაულებრივი ჯგუფები COVID-19-ის ყალბი ვაქცინებით ვაჭრობას ან ნამდვილი ვაქცინების მოპარვას შეეცდებიან.
