მუქარა და შეტევა NGO-ებზე ავტორიტარული რეჟიმებისთვის დამახასიათებელი სტილია - ოპოზიცია

ოპოზიციის შეფასებით, თავდასხმა ISFED-სა და, ზოგადად, არასამთავრობო სექტორზე "ოცნებას" ცუდად დაუმთავრდება და ეს ხელს შეუშლის ქვეყნის დემოკრატიულ განვითარებას.

• "ISFED-ის ხელმძღვანელმა გუშინ თავად გაუსვა ხაზი, რომ არჩევნები გაყალბდა. არასამთავრობო სექტორზე თავდასხმა კარგად არ დამთავრდება" - ამბობს "ნაციონალური მოძრაობის წევრი", ლევან ხაბეიშვილი.
• "ასეთი მუდმივი მუქარა და შეტევა სამოქალაქო სექტორზე არის ავტორიტარული რეჟიმებისთვის დამახასიათებელი სტილი. ადამანი [კობახიძე], რომელსაც აქვს პრეტენზია, რომ კონსტიტუციონალისტია და აკეთებს ამას, კატასტროფაა", - ამბობს პარტია "სამართლიანობისთვის" თავმჯდომარე, ეკა ბესელია.
• "ISFED-მა, როგორც თვიითონ თქვა, დაუშვა შეცომა, მაგრამ დამუქრება არასწორია. გზა აქვს შეთანხმებისკენ სვლას და არა შანტაჟს", - ამბობს "სტრატეგია აღმაშენებლის" ლიდერი, გიორგი ვაშაძე.
• "ხელისუფლება უსმენს არასამთავრობო ორგანიზაციების კერძო კომუნიკაციას, მიმდინარეობს მიყურადება", - ამბობს "ლელოს" წევრი, საბა ბუაძე.

შეგახსენებთ, რომ დღევანდელ ბრიფინგზე ირაკლი კობახიძის თქმით "სამართლიანი არჩევნების" ხელმძღვანელმა საკუთარი ორგანიზაციის რეპუტაციას ზიანი მიაყენა და რადიკალური ოპოზიციის მიერ ქვეყანაში კრიზისის შექმნას შეუწყო ხელი. 

ირაკლი კობახიძე მოითხოვს, ISFED-მა გაასაჯაროვოს ინფორმაცია იმ უბნებზე, სადაც ბიულეტენების სიჭარბე დაფიქსირდა.

აქვე - 11 დეკემბერს, ISFED-მა გამოაცხადა, რომ არჩევნების ხმების პარალელური დათვლის დროს საარჩევნო სუბიექტების მიერ მიღებული ხმების გამოსათვლელ ფორმულაში ხარვეზი გამოვლინდა - კერძოდ, საარჩევნო სუბიექტების მიერ მიღებულ ხმებთან ერთად, დათვლილ იქნა ბათილი ბიულეტენებიც. ამის შემდეგ განახლებული მონაცემებით "ქართულ ოცნებას" 47.6% აქვს, ხოლო მანამდე  მმართველ გუნდს 45.8% ჰქონდა.

12 დეკემბერს, მომხდარს გამოეხმაურა ორგანიზაციის მოქმედი ხელმძღვანელი, ელენე ნიჟარაძე, რომელმაც აღნიშნა, რომ "შეეცადნენ მაღალი სტანდარტი დაეცვათ და თვალი არ დაეხუჭათ".