3 საათიანი მოლაპარაკება უშედეგოდ დასრულდა. მთავრობამ ბიზნესსექტორის წარმომადგენლებს 1 თებერვლიდან მუშაობის აღდგენაზე უარი უთხრა.
კანცელარიაში მიმდინარე შეხვედრის დროს, ეპიდემიოლოგებს და ეკონომიკური გუნდის წარმომადგენლებს, ბიზნესის წარმომადგენლებმა დეტალურად განუმარტეს, როგორ აპირებენ რეგულაციების დაცვით, მათი სფეროების ამუშავებას, თუმცა უშედეგოდ. მთავრობა უარზეა და მოტივად ეპიდვითარების გაუარესების რისკებს ასახელებს.
ვართ სოციალური აფეთქების წინაშე, ამას სიხარულით კი არ ვამბობ, ამას ვამბობ ძალიან დიდი გულდაწყვეტით, დღეს გარეთ არის აქცია და სიტუაცია კიდევ რთულდება. ჩვენი მოთხოვნა იყო, რომ რეგულაციების ფორმატში მოხდეს ბიზნესის მუშაობა და არა ის, რომ ვიმუშაოთ რეგულირების გარეშე" განაცხადა შეხვედრის დასრულების შემდეგ რესტორატორთა ასოციაციის თავმჯდომარე შოთა ბურჯანაძემ
დღევანდელი პოზიცია, რომ პირველ თებერვალს ნამდვილად არ გაიხსნება მთის კურორტები და აი, ორი კვირის შემდეგ შევხედავთ რა იქნება, ეს ჩვენთვის მესიჯია, რომ შესაძლოა, წელს მთის კურორტები საერთოდ არ გაიხსნას. ფაქტობრივად, მეორე სეზონი ჩავარდა სამთო-სათხილამურო კურორტებზე და 60% ობიექტებისა უკვე იყიდება - ამბობს სასტუმროებისა და რესტორნების ფედერაციის დამფუძნებელი შალვა ალავერდაშვილი.
შეზღუდვებით დაზარალებული ადამიანები კი საპროტესტო აქციების გაგრძელებას სხვადასხვა სამთავრობო უწყებებთან ისევ აპირებენ. მზადდება სარჩელი საკონსტიტუციო სასამართლოში შესატანადაც.
